心肝頭猶原

有淡薄仔稀微

故事，咧躊躇

拄精神的詩

閣小可仔塞鼻

無彩府城，遮濟

歷史的芳味

干焦會當順綴

過去的跤跡

舊路行來，就較定著

欲暗仔，沙微的目睭

突然間，慢慢

搝開一座大城門

記持，佇磚仔角內面

閣燒烙，數百冬

悲歡離合，攏變做生鉎石頭

一粒一粒，疊做外牆圍

人情冷暖，就擋咧城外

和家己的孤單，酸甜苦澀

彼欉大欉榕仔樹

仝款，老甲喙鬚  鬍鬍鬍

伊家己嘛是一座城

無門的城，膨鼠佮鳥仔

攏知影

城內，城外

我到底是徛佇佗？

敢講我的詩也是一座城

予我安心，予我憢疑的城

抑是伊，根本

猶倒佇故事裡，咧眠夢……

註解：

躊躇（tiû-tû）：「猶豫」。

干焦（kan-na）：「只」。

綴（tuè）：「跟著」。

搝（giú）：「拉」。

生鉎（sing-sian）：「生鏽」。

徛（khiā）：「站立」。

憢疑（giâu-gî）：「懷疑」。

（陳胤2017/4/29/台南詩行）