又閣來台南矣

佇春天的尾溜

孵一粒，少年美夢

連皺痕，都皺甲起天真

夜鷹，咧偷笑

笑破烏暗的暝

真正有光，閃爍

巷仔內的燈火

恬靜甲若像天星

有影，遮

是一个眠夢的好所在

我的詩，鋏一雙淺拖仔

揹一茭破冊包，長頭鬃

假影做一个性格的文學家

拖咧拖咧，就雄雄

共規台火車拖落南……

有一款老青春

號做府城，袂老

日子，安安靜靜

嘛是一條歌

清爽的風

定著愛開一罐麥仔酒

共伊乾杯，下暗窗外

免注文，拄好

和家己，談情說愛

註解：

孵（pū）：「孵」。

鋏（giap）：「夾」。

揹（phāinn）：「揹」。

一茭（tsi̍t-kha）：「一個」。

注文（tsù-bûn）：「預訂」。

（陳胤/2017/4/28/南寧文學家/頭暝）