我閣來台南矣。

    這擺，毋是來旅行，是來生活。試看覓仔eh，成做一个府城市民，是啥物款滋味？詩，是我的戶口。罔行罔寫，和台南做伙喘氣，嘛穿仝領內褲，阮的秘密佮故事相迵，你若佇路裡拄著，毋通傷驚惶。

    有影，遮，是一个眠夢的好所在，葉石濤的跤跡，定著不時行踮我的詩裡，綴我歡喜，綴我傷悲。

    前幾工，春尾的北風，突然間壓落南，小可反寒，暗暝我佇冊房寫詩，寫甲毋知好穿衫，煞淡薄仔感著，塞鼻，閣起畏寒。昨暗，想講南部較燒熱，被蓋較薄，無疑悟天欲光的時，煞寒甲精神。無法度，這是我塞鼻的舊症頭。哪毋知是毋是傷歡喜所致，抑是新環境猶毋知伸kiu，總是，這是我府城日子的頭暝。

    這兩工，毋誠食，毋誠睏，精神蓋bái。中晝頓進前，灌一鈷燒茶，想袂到，鼻仔開始咧透氣，飯食了，小補眠一下，起床，煞清爽起來矣……

    加話免講傷濟，是講，我的詩，定著嘛愛罔行罔寫。台南，當時行。

註解：

參加過兩擺阿却的<詩行>活動，心肝猶原溫存，借用in的名號，來台南繼續行，詩，愛接紲落去。

(陳胤/2017/4/29/罔行罔寫)