你定著知影

這是我祈禱的範勢

輕輕仔，共天夯起來

慢慢仔，將地放落去

天地之間，是真心誠意

日子，總是

愛對早起的日頭開始

才有光，才有味

五彩的光線

佇玻璃面頂跳舞

拍開窗仔，每一下喘氣

攏是恩情，攏是愛戀

厝鳥嘛知

刁工跳起哩十字架頂

憐惜一下

性命的苦難

樹枝peh過牆圍仔

探頭過來，目睭

嘛有日頭光

只是，淡薄仔澹濕

親像人的願夢

有躊躇，有勇敢

操煩規世人，閣是操煩

勞動，開花結子了後

猶原疲勞艱苦

這，敢是上帝的責罰

你定著知影

我總是勻勻仔

用歌詩，畫一个天

畫一个地

然後，共愛囥佇內底

寶惜。

註解：

Gâu早：𠢕早，「早安」。

夯（giâ）：「舉起」。

刁工（tiau-kang）：「故意」。

peh：「爬」。

澹（tâm）：「濕潤」

囥（khǹg）：「置放」。

（陳胤/2017/5/5/台南詩行）