台灣特有的中秋節風俗

秋天是收成的季節,嘛是做穡人答謝土地的時陣,舊曆八月十五日是土地公生日,田岸邊愛安土地公拐，答謝土地公佇過去彼一年的保庇,順紲歇喘慶祝豐收,準備下一季的種作,台灣各地市區定定以神明生(比如王爺、媽祖等等)作廟會鬧熱的日子,郊區較普遍的是以「謝平安」抑是做醮的方式來請人客。

中秋夜祭是各地原住民族共同的祭拜儀式,台灣人嘛有賞月團圓、拜祖先、祭拜太陰神君(月娘)的風俗,擱有食麻糬、食柚仔、囝仔戴柚仔皮做的帽仔、幌韆鞦(宜蘭礁溪幌韆鞦比賽有百年的歷史，韆韆架有五點五公尺高，參加比賽的選手愛那幌韆鞦，那攑腳踢頭前五尺高的鈴瓏仔，嘉義下路頭三月嘛有幌韆鞦比賽,排灣族有幌韆鞦的結婚儀式)、中秋節烘肉等等,在地發展的特殊風俗,嘛有舉辦歌唱摸彩晚會、音樂會抑是詩詞吟頌會等等活動。