情事兩三件

今年清明,家族培墓的時陣,拄著真久無見的大姑,開講中間透露一位已經往生的長輩少年時代的故事,大姑講彼首「愛著愛到死」歌曲的女主角,其實毋是伊的牽手,是伊讀嘉商的時陣通勤,逐工做伙坐車的嘉女姑娘,對方是醫生世家,因為家長無贊成,雙方只好男婚女嫁。後輩干但定定聽著酒後充滿感情的「愛著愛到死」(這毋是你的無情,嘛毋是我的無義,是因為環境來所致,才著愛分離,…)。知影這段往事,已經是頂一輩無佇咧五冬了後。

電視新聞有時陣會報導:失散多年的親人,透過face book相認的故事,總是感覺真遙遠,最近一位朋友講伊嘛佇face book去予少年時代的筆友認著,對方先問真濟關鍵問題才確認,本來抑感覺真輕鬆,想袂到深入對談了後,才知影當年的逃避無意中深深傷害對方,掠準一生攏予人辜負,毋捌辜負別人,突然間變作這無情的人,心情真沉重,若像一切的悲劇攏是伊造成的,毋知欲安怎彌補。