電風的秘密

有一暗大兄敲電話來講姑丈往生的消息,拄好有一個怹的校友來這坐,掛電話了後順紲共伊講辛校長的消息,想袂到伊竟然連校長佗一工往生、佗一工告別式攏知影,因為伊幾十冬年來攏有咧共校長保持聯絡。

原因是四十冬前有一件代誌予伊真感動,當時他咧讀廣告科,製圖教室著佇校長室對面,熱天大家流汗流洘,校長室煞有兩支電風，有一工一個同學偷偷去校長室攑一支電風過來製圖室吹,唯彼刻開始,大家攏隨時有接受教官抑是導師的調查佮連坐處罰的拍算,想袂到校長逐工佇製圖教室外口行來行去,煞攏當作無發生啥物代誌,一直到三年畢業攏平安度過，雖然校長對伊無半點印象,但是伊認定辛校長是伊一生難得拄著的好人,所以後來姑丈調去新竹,擱調轉來斗六、退休,後生佇佗位上班,娶某這个代誌他強欲比我較清楚。

小漢的時扮家公伙仔,有的做老師,有的做教導,有的做學生,若啥物攏袂曉、干但會曉行來行去的小漢囝仔,干但會當做校長,想袂到一個保守著電風的秘密,逐工行來行去的校長,對學生的影響會這爾深。