字體:小 中 大 | |
|
|
2008/06/20 10:57:15瀏覽739|回應4|推薦22 | |
第12期《菅芒花詩刊》翠苓作品… 1.美麗的堅持 白鴒鷥,巡田墘 跤步愈踏愈空虛 水牛仔兄,無相辭 毋知走唯佗位去 * * * 白鴒鷥,頭攲攲 形影愈行愈稀微 四跤仔嫂,無講起 歌聲恬靜走去覕 * * * 白鴒鷥、白鴒鷥 紅紅夕陽 照你白衫仔裾 田洋.嫷嫷 因為你 美麗的堅持 2007年6月 2.人生一剎那 天清雲白光炎炎 遠遠山嶺山抱山 山嶺永遠袂無伴 生生世世相對看 *** *** *** 深更月光照孤影 春來秋去一直行 人生到底是為啥 鹹酸苦澀一剎那 2007年6月 3.半爿月娘 離開中秋 透早的天頂 賰半爿月娘 陪伴滿天白雲的溫柔 * * * 恨無天眼通 看向北方~ 囡仔 敢有踢被睏勼勼 敢有穿衫無「哈啾!」 * * * 中秋的月娘 請你一定毋通笑阮無勇氣 塗跤澹澹彼兩滴 是昨暝未凋的露水 毋是阮想囝的珠淚 2007/10 4.秋天下晡時 親像這款秋天的下晡時 雄雄起風無張持 阿母一手攇衫、一手牽小弟 行到教室岑墘邊 看著老師教阮學寫字 手佇虛空、一畫閣一筆 喙綴老師輕聲唸 一橫一直是「十」字 無橫無直是「淡」水 阿母講伊看著誠趣味 * * * 聽講 阿母本成毋是毋捌字 少年時,捌讀「暗學仔」誠認真 快樂唱歌閣捌字 上台佮人比歌詩 著等心內足歡喜 * * * 嘛拘 我毋捌聽過阿母唱歌 我毋捌看過阿母寫字 * * * 原來 我細漢險險仔無命彼咧驚 予阿母袂曉唱歌 予阿母袂曉寫字 * * * 佇這款的秋天 想著阿母為我的犧牲 心內誠空虛 阮~只有是快樂來唱歌 阮~只有是認真來寫字 檢彩(也許)會當彌補 阿母為我失去的 青春快樂時 2007/11/ 5.秋心雜思 秋風趕暝工 共台灣欒樹黃金色的嫷衫 染做烏透紅 適合秋天的尾暗 佇下班的十字路口 共款的景色,年年感動無仝 這大自然的奧妙 敢會當講 這 只是平常的春、夏、秋、冬! * * * 路邊一擔砰米芳 「碰!」一聲 驚一下參伊的米芳跳平懸 身邊一台戛土機 運將探頭 掠準伊欲問路 笑笑講:「驚著哦?」 我回應伊一下感激的笑容。 車駛行 伊閣斡頭叮嚀:「愛去收驚啊~」 這溫暖 敢會當講 伊 只是路邊相閃身的生份人! * * * 秋夜冷冷 洗衫機咧無閒 那等晾衫那看冊 小故事 撥開想囝的心情 覆佇冊頂就入夢景 聽著樓梯有人傱落來 舉頭欲看...夢醒 這心情 敢會當講 只是空岫而已 2007年9月
|
|
( 心情隨筆|心靈 ) |