看人新總統就任咧唱【國歌】

現場有人唱甲目屎流目屎滴

我知影彼是歡喜的目屎

因為國歌內底有怹歡喜的氛圍

．．．．

這個場面，予我想起阮阿爸的【國歌】

三、四十年前

佇庄跤

學校教阮唱【國歌】

阮學會了後

轉到厝，誠歡喜唱予阿爸聽

阿爸聽了

面仔沉沉講：彼毋是我的【國歌】

伊的【國歌】是日語的．．．

佇彼個戒嚴時代

阿爸大膽透露這層心事

．．．．．

解嚴前後

阿爸閣講一層

伊親目看著的歷史鏡頭

戰後，日本人轉去矣

人民歡喜祖國欲來接管

阿爸彼時是少年人

參逐家共款歡喜佮抱著新希望

坐足久的火車

去港口迎接傳說中的〔國軍〕

．．．．．．

〔國軍〕落船

凊彩吥痰吥瀾、路邊放尿亂濺[tsuānn]

精神散漫、跤步貧惰

這款的〔國軍〕

欲怎向望？

阿爸看一下心疼甲

腳酸手軟、全身無力

幾何工食袂落飯

．．．．．

咱人．．

定會共[惡星入境]

當做是[河光燦爛]