透早，悲涼的哀樂響透天，阿桑，今仔日是你欲出去的日子。

半月日前的一個暗頭仔，救護車咻咻叫駛入來巷仔底，將你載出去，過無兩點鐘又閣將你載倒轉來矣，第二工看著規條巷仔每一戶門口，夆貼一塊紅布仔，我知影，阿桑你走矣！

無常啊，日時才看你佇巷仔行踏，想袂到你講走就走！

其實阿桑你參一般人比起來，並無算歹命；兩個囡仔攏有空課做，雖然無序細佇身邊，嘛拘有翁婿參你做伴。自從我蹛入來這條巷仔認似你開始，逐擺參你講話當中，你總是憂頭結面、怨嘆濟濟，怨嘆翁婿對你無夠貼體，身體閣較艱苦抑著落灶跤款三頓予翁婿食。我袂曉安慰人，干單會當共你講，愛往好的方向想，序細頭路穩定、免煩惱食穿、有厝有車、生活會得過，毋拘，無論我按怎講，你抑是閣有濟濟的怨嘆；久來，我若看著你，攏無啥敢參你講話。

前幾工隔壁蘭仔來揣我開講，我共伊講想袂到阿桑赫緊就過身。伊才共我講是食農藥仔的。伊講過年彼站仔阿桑就共伊講，藥仔已經準備好矣。我問伊敢無共苦勸？伊講哪會無。會當苦勸的話攏講矣，阿桑抑是一直怨嘆講歹命，活落無意義．．．．。

你蹛附近的大後生無閒家庭、無閒空課，無法度定定轉來照顧你，細漢後生去中國做生理，嘛罕呢轉來，你身體無爽快的時，翁婿煮的你閣無合意食，想欲叫查某囝轉來，查某囝四、五十歲人，誠無簡單才找著頭路，毋甘放．．．！就按呢，想袂開家己結束難得的人生。

這幾工，恬靜的透早、青冷的暗暝，看你的翁婿陪人坐佇門口守靈，定咧問人你入殮時陣愛穿戴的衫仔有啥愛注意，閣定佇食飯時間，看伊家己機車騎咧，出去街裡食。阿桑你若知影講，你走了後翁婿是赫呢關心你、你走了翁婿其實是孤單的，毋知會後悔用家己的雙手結束性命否？

每一層困難的代誌，總抑是有解決的方法，無人款三頓，敢毋是會當倩人來煮？敢毋是會當電話叫人送來？上無，嘛會使考慮蹛老人院，有人照顧閣有三頓燒．．．。只要活咧，啥乜代誌袂當解決咧？！

阿桑，你的離開，予我突然間好像看著頂一輩的查某人生活的縮影，認命做的表面，參著一寡仔毋甘願的成份，全心共翁婿顧徦無微不至，煞閣怨嘆翁婿無佇家裡的家事伸手鬥做。

哀樂聲漸遠，但願你的神魂猶佇無遠的所在，聽我為你念一聲佛號。

法照大師有講：此界一人念佛名，西方便有一蓮生，但使一生常不退，此華還到此間迎。

寬寬行；阿桑！