頂工回答一位網友兮留言，因為對方寫兮是英文，阮想講禮貌上愛用英文甲應。雖然英文捌無幾字仔，嘛決定準作練習來試看嘜咧，無想著愈寫愈長，袜凍囥置咧伊兮訪客留言內底。著雄雄存辦死兮甲搭踮置文章創作。今馬來甲這篇文改寫作台語文。向望諸位台語文先進，若有看著無妥當兮所在，盡量提出來講乎阮知，予阮一個學習兮機會，感恩！ 

阮相信自然選擇佮進化論繼續咧影響現代兮科學，阮提起自然法則毋是存心卜疏忽科學兮探究佮貢獻。毋過當科學兮討論有牽涉著性命、生死、生活兮時陣，宗教兮哲理著跕腳跕手索入去思考內底矣。會有即種想法，真明顯是因為遐的攏是宗教所講兮主要課題。

毋管啥乜問題，一旦卜開始討論，攏總愛靠講話、寫文、手語、符號、數學程式種種訊息溝通兮技術。遮個技術攏有怹無仝兮限制，世界各地無仝款兮語言，予即種討論加添一寡障礙。

真濟父母攏捌拄著予囝仔問（ㄇㄥˋ）袂煞仝款兮問題：「我（汝、阿公、阿媽、阿祖….）是按佗位仔來兮？」甚至大人嘛有相仝兮疑問。頭一個人是安怎來到即個世間呢？是先有雞抑是先有雞卵？若是遮個問題攏總會使用一句「世間兮一切攏是偉大兮創造者所創造兮」，安呢科學家著減少真濟問題通研究囉。毋那一寡基督教徒相信即種講法，阮嘛捌聽過科學家看著巧妙兮景緻了後，讚嘆講干礁神才有即種能力通創造出來。若有一個人迹呢好膽敢問講：「若準仔每一項物件攏是夆創造出來兮，是啥乜來創造出創造者咧？」即個人真正會夆認定是褻瀆神明兮叛徒。

阮毋是科學家，毋敢確定「自然」佇「自然選擇」即個名詞內底有啥乜特殊兮定義無。但是佇阮進前所講兮自然法則，是佇咧韋氏字典內底所解釋講兮：「物件兮基本特質，造成物件的品質，基礎特質」。即個自然法則本成道是安呢，無需要夆創造出來。比如講溫度若降低，水會堅凍，加熱就會蝕水。科學家做各種兮研究，來發現真濟咱本成毋知原因的現象，也擱有真濟等待怹去發現。

當討論兮重點囥置咧自然選擇、進化論佮創作論兮時陣，阮比較得卡願意接受用科學方式兮解釋。著親像科學家，唯目前實際存在兮情況，觀察進前是安怎變化過來，去找出怹兮成因。佛法麻是用仝款兮方法，唯現在的問題，越頭去看代誌兮真相，安呢所發現兮道是緣起法，也道是佛法兮基本原則。

緣起法是佛法兮基礎教義，世間兮物件、代誌攏是「相依相成」。逐個眾生佮現象攏因為怹佮別個眾生、現象有相牽連著才會發生存在。所以講無任何一項是獨立存在（獨存），家己出現的（自生）。因為世間所有兮一切攏是真濟因緣佮條件和合才會凍成就，所以攏總無一個實體存在。