──2016彰化縣台語文學創作比賽評審感想

         早就風聲，咱彰化辦中小學台語文學創作比賽足足十幾冬囉，真正是感心，佇現此時對本土母語無真友善的大環境之下，會當按呢堅持接續落去，定著愛先共主辦單位拍噗仔啦。

         頭一擺來遮做評審，有夠榮幸佮歡喜，彰化好bái攏是家己的家鄉，母語復振的事工，坎坷艱難，結合有志相佮來做伙拍拚，是理所當然的，雖罔拄頭是有淡薄仔煩惱家己才學不足，後尾想想咧，就放膽共liâu落去。

         這屆的台語詩，四組總共就欲倚300件投稿作品，論心講，看甲目睭有影強欲脫窗去，不而過，心內偷偷仔咧樂暢，因為這嘛代表咱彰化久長以來，佇台語詩的創作面向，有一定的活力佮節奏，順這个範勢拚落去，濟少攏會有一寡仔火子，佇現有的國民教育裡發光，當然，咱嘛知，這條路頭猶原閣真遠，也有真濟奮鬥的空間，所以，佇評審會議煞鼓的時，對將來母語推sak的事工有一屑仔建議，我就誠心拆白講，好佳哉，咱的承辦汪小姐，心肝好腹腸闊，有共咱聽入耳，比如：文類的調整佮正名、提供優勝者獎金獎品，以及公開頒獎等等，予咱的學生較濟實際的鼓勵，對咱母語文學的提升，決定有絕對的幫贊。

         其實，上根本的，是透過教育體制的改造，有系統的釘根教學，無奈目前，咱的國中猶未有母語的課程，毋過，也是會當透過一禮拜2-4節的彈性課程，抑是用社團的名義來下力，這是咱縣府的權責，免等中央的政策改變，有心就有法度做，跨單位整合一下，加tsông一寡仔經費嘛好，提供予咱縣裡這陣優秀的母語支援老師，有較好的待遇佮教册空間，按呢，才袂予in的才華拍損去，而且，咱足無簡單作伙點起來的火，才通好繼續燒。

         我是一个佮意寫詩的人，有時陣，會對紙筆面頂雄雄跳出來，共詩寫佇咱的土地塗肉，做評審，也是我的一首行動詩，這馬佇遮踅踅唸，嘛包含在內，總是一粒疼心，向望咱彰化的鄉親序大以及高層遐的老公仔標，若有得失所在，毋通責備我的潦草，猶閣看有我的演出才好。

（陳胤/2016/11/5）