──2017彰化縣台灣母語創作比賽評審感言

    秋天，行到尾溜矣。風，是有一寡仔透。

    這个歡喜佮哀傷交插的跤兜，照舊年的風勢，我沙微的目睭，當無閒咧看咱彰化一年一期的母語文學作品，仝款是台語詩組，今年，國校中年級有24件，高年級有107件，國中組有45件(有一間學校詩稿佔總數的2/3)，教師組有63件，總件數239件，按呢，算袂少矣。

    先莫論詩質，這種成果，定著愛共咱這陣辛勞的母語老師拍噗仔一下，尤其支援老師，佇無蓋好的待遇佮環境之下，猶原願意遐爾仔拚勢，無惜代價，來指導咱學生囝仔寫作、投稿，有影感心。

    對投稿件數的分配來分析，咱加減就會當看出，國中這个階層母語教育的困境，不止仔大，照講，當咧青春的少年家，腹肚應當有足濟墨水才著，濟濟的眠夢佮怨慼（tsheh），若有法度透過詩的創作表現出來，相信會加真濟好的作品。可惜，咱國中並無母語課程，甚至連母語社團都無，實在有夠拍損，無彩咱這陣優秀的母語老師，根本是英雄無用武之地。哈，所以佇遮，我嘛繼續來做歹人一下──誠心誠意，共咱縣府建議，向望會使透過行政程序，予咱每一間國中，每一个年級，逐禮拜，利用彈性課程安排一節母語課，初步若無法度逐年級攏有，會當一年一年沓沓仔來，經費開佇遮，算盤按怎擉（tia̍k）就會和（hô）啦，因為母語是咱民族咱土地的根，根若斷，咱是欲提啥物來認捌祖先的面容咧？

    若無，至少逐間國中，嘛愛撨（tshiâu）一个母語社團啊，予有趣味的囡仔有一个機會好學習，社團是包含佇正課內面，免閣另外開錢，而且全校攏總才設立一班，無可能會影響學校原來的運作，毋過按呢，咱對國校一路行來的母語教育，就會當接續落去，一校干焦有30个學生嘛好，全縣42間國中，就有千幾个台語囡仔會當生湠……定根佇國民教育的母語教育，才是真正久久長長的教育！

    進前，咱縣裡拄成立一个「台語文園區」，咱嘛歡喜共祝福，這是蓋讚的母語活動基地，毋過，鬧熱的活動煞鼓，總是愛予當咧燒烙的心，佇體制課程的肥底裡孵卵、生長，抑無，恐驚仔親像放煙火仝款，燒了，啥物就無賰。按呢，一切的一切，攏是枉然。

    國中、縣立高中的管理，攏是咱縣府的權責，才一節課，或者是一个社團爾爾，哪有啥困難？我相信，嘛真期待，頭一个12年一貫的母語教育，會當佇咱彰化開花結果，到時陣，定著是全國上奢颺的。

    紲（suà）來，會當來思考，共「閩南語」這个用詞，佇簡章裡改轉來「台語」，按呢，較貼倚歷史的事實佮土地的感情。實際上，咱彰化辦「台語」文學創作比賽，已經十幾冬有矣，最近兩三冬，中國政治因素介入，才變做「閩南語」的。

最後，嘛是定定咧講的代誌，愛盡量提供淡薄仔獎金啦，予得獎者有實際的鼓勵，這，濟少會提升比賽作品的質，對量來講，決定嘛是有幫贊。堂堂一个縣級的文學比賽，得獎者竟然一箍銀都無，敢講會過？無，禮券、獎品，嘛好。

雖罔，話是有較囉嗦一點仔，總是，一粒疼心啦。相信，咱攏誠期待，彰化是一个有未來、有氣質的城市；是講，氣質著愛對關心母語文學起鼓，才有媠氣的未來。咱知，春天，猶閣真遠，毋過，定著會來。

(陳胤/2017/11/2)

@原始圖片來源/彰化縣政府官網