天漸漸光矣。光線佇彼欉翠青茂密的榕仔樹尾溜，躊躇。

　 我的目屎大概已經焦矣。規暗，這个公園天頂的星，會當見證所有的一切，我的孤單、悲傷佮絕望。

　 長長的柴椅，已經有淡薄仔露水。這是我頭一擺家己睏佇台北街頭，其實袂當講睏，因為我干單坐佇遐爾爾，干單流目屎，干單後悔怨恨。本來咧想，一个查某囡仔家己佇遮，定著會發生啥物恐怖的代誌──管待伊去死咧，恁祖媽就是無想欲活矣，我刁工（thiau-kang）欲等待魔神仔來掠──想袂到，台北的治安無親像人所講遐爾bái，規暝干單有一个若歹人的人經過，斟酌看，根本是燒酒醉的，伊醉甲徛袂在，甚至連路就看袂清，佇phú-phú霧霧的電火柱仔跤，若欲看著我，就愛誠拚的。閣講，假使伊真正看著我，恐驚會予我亂甲若鬼的長頭鬃佮慘白的面容驚死……想到遮，煞起愛笑。毋過我知影，這是苦笑。

　 天漸漸光。榕仔樹密集的枝葉內面，有鳥仔聲，咧流轉。

　 我知影這種古錐的鳥仔是「青笛仔」，阮細漢攏按呢叫伊。輕柔司奶（sai-nai），美妙的歌聲，予我的心迷醉，伊的聲音，予我若飛入去光速網路，咻一下，就飛轉去囡仔時陣的門口庭，遐，永遠是我療傷的所在。想起來，伊是唯一會當安慰我的朋友，嘛是永遠袂反背我的朋友。

枝葉裡有一个岫，對外口就會使看著岫的四箍圍仔，有幼秀的青草，草面閃熠，透早拄出世的日頭光。頭擺發覺鳥仔岫，就是伊第一遍佇我遮過暝的時陣。彼暗，阮（guán）兩人身軀互相意愛了後，情緒一時無法度平靜落來，我規暝失眠，佇秘密已經變作毋是秘密的時，我真驚兩人的感情，會親像小說搬演的故事仝款，開始變化……伊竟然睏甲鼾鼾叫（huânn-huânn-kiò），若死豬的，毋過伊緣投標緻的面容，猶原掛佇勇壯的身軀頂懸，正面喙配（tshuì-phué）倚下頦附近的彼粒痣，予月光照甲若像天星仝款，孤單又閣驕傲，我自然伸手過去，輕輕仔摸伊小可捲曲的頭鬃。伊精神矣。目睭沙微沙微，微微仔笑。

「睏袂去喔？」

「嗯。」我叫伊陪我去樓跤的公園散步一下。

　 踅一時仔了後，阮就做伙坐佇這隻柴椅面頂，相攬倚靠，一直到天光。這段時間，阮真少講話，干單手牽手，面貼面，有時偷偷仔相唚（sio-tsim）一下，涼涼的熱天暗暝，凡勢仔，干單適合拍開所有的毛管吮氣，無透過語言傳達的愛，大概才會使直接迵（thàng）到靈魂深底。天光時，我閣會記得彼港日光，就正正照佇這欉榕仔樹頂，阮差不多同時做伙看著這个奇妙的情景──一隻青笛仔，喙咬一尾蟲誠靈巧鑽入去枝葉內面，一群鳥仔囝喙擘甲開開開，相爭佇日頭金色的光線裡，擽擽（ngiau-ngiau）鑽……阮攏看甲誠感動，感動in對性命的拍拚頂真。

　 我嘛知影，彼个岫應當早就無咧用矣，因為看無新的草枝，而且舊年彼群鳥仔囝，早就展翼高飛，毋知去佗矣。

　 這時，我自然閣想起彰化庄跤的厝兜。閣有，守寡已經兩冬外的老母。

　 天漸漸仔光。對新中街頭的上班族，來來往往無閒的跤縫，起頭。

　 我的目屎，又閣恬恬流落來矣。我開始看著街路，有一寡仔好奇的眼光。我才袂癮（bē-giàn）插伊，歹年冬厚痟人，無增差我一个。In逐个攏嘛面色匆忙，無遐濟時間看我這个痟查某，in較器重的，應當是公司頭家冷心無定的眼神。而且，我現此時的模樣，可能連朋友就認袂出來，莫講遮逐工干單和相閃身的死人面。

　 今仔日，我決定無欲去上班。我欲殘殘共伊失蹤一工。佇頭家佮同事眼中彼个凡事照起工的我，性命消失一工，看覓仔會按怎無？

　 自從大學畢業了後，就留佇台北拍拚，對第一份頭路佇出版社做編輯，到現在佇廣告公司做文案主管，月級對兩萬外到這馬的七萬捅頭（thóng-thâu），十冬來，換過幾落个頭路，也綴咧換過幾落个男朋友。伊是我三冬前拄入去這間公司無外久，同事紹介認捌的。伊佇一間有名的外商電腦公司做工程師，一年薪水欲倚兩百萬台票的高薪階級，in老爸又閣是高級的大生理人，所以看起來若親像貴族仝款。阿人也生做懸躼（lò）懸躼，不止仔飄撇，閣捌做過廣告Model。「是一个鞏（khōng）金包銀的羅漢跤喔！」阮遐的同事攏按呢剾洗（khau-sé）。親像我這種出身，若毋是伊一直扣扣逐，本來我是毋敢數想……

　 這時對面早頓店邊仔的巷仔，出來一个歐吉桑，小可禿頭禿頭，穿烏色西裝褲，配白色長衫，毋過無結ne-kut-tai（領帶），正手提一个烏色公事包。我不時佇上班時陣會拄著伊，綴伊後面行到民生東路等公車，伊佮我的車牌仔相隔壁爾，毋過自頭到尾，毋捌說過話。我袂記得這種情形偌久矣，我看幾落冬有矣，也毋知伊是毋是知影我的存在。這就是台北。目看心無看，正耳聽入，倒耳隨走出去，一个無心肝的世界。

　 兩冬前，買這間厝的時，老母佮濟濟的朋友，包括伊攏反對。無到三十坪的舊公寓，七百外萬。每月日愛納（la̍p）四萬箍貸款，現此時景氣無蓋好的台灣，隨時攏可能挵破飯碗，壓力是有影誠重。毋過蹛彼種若像粉鳥籠仔、租金一個月就愛開萬五的套房，我已經擋袂牢矣，想欲先安搭好這个都市型的身軀，一切才閣講。當初甲意這个社區，是因為遮綠地特別濟，大大小小的公園滿滿是，生活機能又閣好。街路口佮民生東路相接，倒爿是金石堂冊店──遐是我揣靈感上好的所在；正爿是7-11超商──我半暝若欲補給糧草，就真利便。另外一頭接民權東路，邊仔是一座運動公園，隨時會當予我這个32歲欠活動的獨身查某囡仔走走蹌（tsông）蹌的。上重要的因故，其實是遮有濟濟的老樹，我目睭若瞇起來，就有故鄉的氣味嗆（tshìng）入去鼻空。

　 阮阿母總是擔心我的婚事：「一个查某囡仔將來嘛是愛嫁人…….」這是伊反對的理由。堅持欲買房子，其實閣有一个的原因──我誠煩惱獨身踮佇庄跤的老母。若買厝，就會使姑情（koo-tsiânn）伊上北來佮我做伙蹛，啥知，逐擺蹛無一個月，就吵欲轉去庄跤。「厝邊隔壁攏嘛會互相照顧啦」，伊叫我免厚操煩。阿爸過身已經兩冬矣，65歲的阿母，生活適應了閣算袂bái，空空靜靜的農舍，只是看起來較孤單一屑仔爾爾。

門口庭邊仔的半分田地，變成伊的精神寄望，平常時干單種一寡仔青菜，賰的地就放予伊去拋荒，生活閣袂傷過勞動。逐個月，我會寄一萬元轉去予伊做所費，嫁去台中的小妹，嘛會佮尪婿，三不五時就轉後頭厝看覓仔，有博士學位的大兄，雖然蹛佇美國咧高尚，時常嘛會拍電話予阿母，關心一下寒熱飽枵（iau）…..

　 天漸漸光。對街路咻來咻去的車窗玻璃面頂，湠開。

　 規暝無睏，我的目睭，閣酸酸澀澀。新中街的車，其實攏無駛真緊。有幾落擺，我想欲對車窗面頂，走揣家己失魂落魄的面容，結果攏失敗矣，干單看著，一个閣一个，咻一下就飛過的烏影。

　 早頓店的頭家，猶原無閒東無閒西，跤手誠老（láu），雖然我一點仔喙斗（tshuì-táu）就無，毋過真懷念頭家親切的招呼──頭一擺來遮食早頓的時，無啥慣勢，嘛真驚惶，佇冷淡無情的台北城市，閣有這款溫暖的店，連收錢就予人客家己擲（tàn），利便趕時間的上班族。這嘛是愛社區居民相互信任才有法度按呢。所以，頭家親切好禮的「鰲早！（gâu-tsá）」，自然就變成我早頓的一部分。

　 我突然間想著，彼對時常和我相閃身的母仔囝，哪無出現？凡勢是我傷過傷心無咧注意看。彼个囝仔穿國校的制服，三、四年級的款。阿老母攏是上班族的套裝打扮，大概欲先送囝仔去學校，才閣趕去公司上班。我一直佇腦海當中走揣in的形影。假使，我嘛較早結婚……

      早頓店隔壁彼間得人疼的幼稚園，陸陸續續有家長送囝仔來，少年的查某老師，徛佇門口，用親切的笑容送別，遮為生活奔波、無閒飼囝的都市序大人。In凡勢想講加賺一寡錢予囝仔生活較舒適，毋過，囝仔就愛減少一寡仔爸母溫情，世間，總是有一好就無兩好。這當然是我這个獨身查囡仔的風涼話佮道德想像，人咧食米粉，我咧喝（huah）燒。毋過，理智佇心內共我講，無閒，並無全然是甘願欲做涸涸蹌的青瞑牛，抑是啥物「拜金主義」咧使弄，無定著，也是現代都市人對性命無奈上悲壯的抵抗。

　 我看著路邊收費的停車格，才拄空出來，真緊又閣予人填滿。都市裡，匆忙流轉的把戲，攏佇每一个路角咧上演，人是主角，導演卻是上帝。車駛入去閣駛車出來的跤兜，一群穿黃色kah-á（背心）的清潔人員，就愛緊行入去，共落葉佮畚埽掃清氣，跤手熟練甲予人觸舌（tak-tsi̍h）。阿倚街口的彼間燒肉店，鐵門閣崁牢的，猶未開門做生理。歇睏日若無出門，我時常會去遐買便當填（thūn）腹肚。若有朋友來相揣，我會招in去幼稚園邊仔的客家食堂，『用客家小吃招待客人！』我總是按呢滾耍笑，閣若拄好是暗時，酒蟲咧作怪，也會烏白切一寡豆乾滷味，去樓頂做伙飲（lim）一下過癮（giàn）。都市生活，有時總是需要一寡仔酒精，小可祭拜一下，假日暗暝吹過寂寞靈魂的冷風。

　 一陣涼風吹來，窸窸窣窣，有幾片黃黃的葉仔飄落。耳空竟吹來溫柔的聖詩歌聲──彼間離阮厝無偌遠的台語教會，今仔日是拜一，哪閣有聚會咧？我有淡薄仔懷疑，閣共耳空拍較開矣。就當作有啦！堅持用母語傳道的教會，佇台北，更加使我感心。我想耶穌對受苦的人是慈悲的，毋過我知影，伊無法度解救我，會當解救我的人，恐驚干單賰我家己爾。揣一工，我閣有才調佇寂寞的暗暝，真正清心自在，和家己的形影做伙飲一杯葡萄酒的時，一定誠誠懇懇唸一首詩，來讚揚報答，無暝無日為世間苦難操煩的眾神。

　 天色已經光甲會刺目。對忽然間衝來青狂的喇叭聲當中，反射轉來。

　 蹛佇新中街已經兩冬矣。逐工，差不多仝款的動作，仝款的跤步，仝款的時辰，仝款的心情佮仝款的早頓。上班予生活機器化，但是無上班又閣是欲按怎？我這个負責創意的文案主管，並無法度替家己單調的性命，揣著閣較好的創意。畢竟，性命佮商品推銷無仝，掠準有閣較多閣較媠的廣告包裝，最後嘛是愛家己一个，共孤單吞落腹內。

手錶仔面頂的時針，一格一格盤過性命的刻度，我的青春佮理想，佇針佮針互相鬥爭之下，慢慢老去矣…..新中街的面容，從來毋捌親像今仔日按呢，遐爾清楚過──若真正欲講，其實毋是新中街變清楚，是我家己，家己以早毋敢面對的面容。

　 恐怖的暗暝，過去矣。我卻又閣咧流目屎，只是這陣的目屎，有較清較光一寡仔。靈魂受傷的時陣，我總是會揣一个寂寞的所在，恬恬仔坐，然後沓沓仔共目屎流予焦（ta），痛疼就會綴目屎流去真遠真遠的所在，然後等待傷痕漸漸收phí（結痂），漸漸復生。小漢時陣，攏是阿母伸出溫柔的手，共我留佇喙配（tshuì-phué）最後未焦的目屎擦掉。毋過兩冬前，阿爸過身的時，我卻是按怎擦嘛擦袂焦，阿母滿面燒燙燙的目屎……目屎閃光當中，竟然又閣浮出昨暝的情景，佮伊的形影，彼時伊講的話，若目睭無擘金相仝，毋過真清醒：

　 「我感覺伊佮我較合，真歹勢……」

      我犁頭，恬恬無講話。

　「咱閣會當閣做好朋友…真……」

　 「免閣講矣！」

      我兇兇共伊的話剁掉，抓狂矣，叫伊隨共恁祖媽死出去。伊躊躇一下，嘛是鼻仔摸的，失神失神行出阮兜。

　 當伊消失佇窗外烏暗的所在，我的目屎就若親像雨，佇窗內，落袂離……

　 我恬恬坐佇兩冬前，佮伊甜蜜相倚的柴椅，等待目屎漸漸流焦，等待天，漸漸光……

（陳胤/2015教育部台灣閩客語文學獎/社會組/台語散文/第二名）