 
字體：小 中 大 |
|
|
|
| 2012/01/09 09:58:20瀏覽211｜回應1｜推薦12 | |
| 一條溪水一世人會當載juā濟憂愁？
無人知影，伊的心事，恬恬藏佇溪底 是安怎的湍流佮躊躇…… 黃色的蝴蝶，展著美麗的夢想 飛來飛去，飛來飛去，飛作 一領薄薄的新娘衫，穿佇雙溪的樹林 所有的情愛，用文學作伴娶，攏總 嫁予笠仔山腳的你 雖然有驚惶有歡喜，你嘛勇敢 用肩胛頭共伊擔起來，擔起來飼大人 漂洋渡海 翻山過嶺的願望 佮心意，雖然有時陣親像一座 島嶼hiat呢重…… 一條溪水一世人會當唱juā濟歌？ 啥人知影，雙溪的水位啥物時陣 開始咧流，流kah滿山滿嶺的 歌聲佮春風，毋過，我看著你的筆愈磨 腰愈彎，筆愈磨，頭毛愈白 是安怎一個故事，予人無怨無恨 用規世人的青春去追求 奉獻 是土地的芳，是海水的鹼 抑是目屎流過嘴配的毋甘 佮 溫暖 一條溪水一世人會當有juā濟情愛？ 上天知影，千千萬萬的蝴蝶的翅胳 若親像焦葉仝款，隨風飄落，彼時 正是愛情死亡之時，妖魔鬼怪的手 掛著正義公理的白手套，giâ著 鍍金的彎刀，準備收割你的家鄉 的未來…… 無土地，哪有文學咧？ 彼時，你無顧一切拖著老命 以庄頭伯公的名，徛佇橋頂大聲呼叫 呼叫千千萬萬美麗的魂魄，閣一擺倒轉來 轉來笠仔山腳，守護田園，守護山林，守護溪河 守護──祖先一粒稀微硬頸的火籽…… 彼時，春風若像母親的雙手，搖著一個 希望的竹籃，搖呀搖，搖呀搖，搖kah 冷心的雙溪，目屎流 目屎滴 啊！一條溪水一世人會當有juā濟目屎？ 你敢知影，若看著你堅心的形影 貼印佇水面時陣，我就知影 島嶼文學的水泉，永遠未焦，親像 有千千萬萬翅胳疼惜過的雙溪 仝款，一直流，一直流…… (陳胤/2011打狗鳳邑文學獎) ◎註解： 1.鍾鐵民，高雄美濃人，徛家後壁是笠仔山，山腳有雙溪流過，溪岸以早是「黃蝶翠谷」的所在；伊是台灣農民文學的重要作家，老爸是有名的文學家鍾理和；關愛鄉土的伊，帶領鄉親推sak「反美濃水庫」運動，2011年8月22日，因為心臟病過往，享壽71歲。 2.先生：客語，『老師』。 3.juā濟：『多少』。 4.giâ著：『扛著』。 5.伯公：客語，『土地公』。 |
|
| ( 創作｜詩詞 ) |
