這是我第二擺為小城綾子的文學作品寫序，第一擺是伊2007出版的華文小說《城市痞子》，彼當時我就欣賞擱讚嘆的講：「這是沒乎人注意著的珍珠，伊的文學修養並無輸目前任何一位台灣華文文壇出名的作家。」我安呢講，並不是吹捧，因為我佮綾子並無熟悉，敢若只有佇台南文友聚會拄過一擺，所以這純粹是出自心內的欣賞。毋過，綾子的作品確實是有卡少淡薄，這是伊愛去努力的。

 今年，2020年，綾子突然來批，邀請我替伊的第二本小說《月落胭脂巷》寫序，這是一本台語短篇小說，我一方面歡喜綾子終於擱再完成一本大作，一方面為這是一本台語作品感覺驚喜，雖然我佇第一本冊的序就有講，綾子的文字優美、細緻，毋過會當自然的融入鄉土故事佮台語對話，這是非常難得的，同齊提升華文佮台語創作的水準。這幾年，我有注意著，綾子得到幾個台語文學獎，這馬伊出這本台語小說，我當然袂意外，毋過相當歡喜伊用全台語創作，有伊的加入，無疑的，台語文壇會因此閣較豐沛，水準也會擱較提升。

這本台語小說，猶原保持綾子過去作品的特色佮優點：文字典雅、故事動人，關心社會，對情景的描寫非常重視、用心，經營的氣氛乎人會沉入其中，通界難得的是，有一位女性幼膩的心思，所以會當寫出台語比較卡欠缺的意境。這本小說內底，我通欣賞的應該是仝名小說〈月落胭脂巷〉。譬如，一開始的：

  「觀月一手捾菜籃仔，一手提一个貯半爿西瓜的紅塑膠橐(lok)仔，肩胛頭敧敧大伐步行，早起十點的日頭對頭殼頂摒落來，逼出伊規身軀汗。……」「小如粉粉的面肉像水蜜桃，喙角邊兩个小小的酒窟仔，甜甜的笑容佮早期的歌星尤雅誠相像。小如人媠喙甜逐擺見面攏叫伊『新娘仔姊姊』」。將人物的面形、形影、動作、神韻，非常逼真的表現出來，親像看著觀月佮小如就活跳跳佇面前出現。

  「觀月手曲(khiau)夯懸，頭敧一爿用彼領淺水色、衫仔裾尾印一蕊蓮花的短䘼棉衫拭鬢邊的汗。」連服裝的款式、色水、花樣嘛攏表現出來，這是典雅的文學家才會注意著的細節，毋過無形中會增添文章的藝術成分佮美感。

  「亭仔跤盡磅一條短短的紅磚仔路，斡入正手爿第一條巷仔，巷口矗一个褪色的原木牌仔，用楷書的字體寫著『胭脂巷』三字。」「這條胭脂巷無闊，差不多干焦會當一台車一个人相閃身，巷內兩排南北向三樓透天厝，每一戶紅漆大門新舊無仝，有的褪色、有的落漆、有的看起來像拄重漆過無偌久。」這是對環境的描寫，會當乎人對故事的環境有擱較深入的理解，因此對劇情會當有擱較深的融入，就親像看電影安呢，當然，這嘛是一種文字美學的表現。

  所以文字要真正注意去經營、描寫遮「視覺」的物件，同時，這嘛是文字是毋是會當變成文學、藝術的關鍵，我是感覺而且佩服，綾子佇遮方面有真正深的功夫和表現，嘛是現陣時台語創作愛注意佮提升的所在。

  當然，小說就要有故事，現今台灣華文創造誠濟綴世界流行，行「抽象」、「意向」，甚至「解構」的路線，結果普遍乎人看無，造成讀文學作品的人大量流失，然後再來感概「文學已死」，怪罪別人，無欲反省是家己用傷隘的學院思想來控制主流媒體。好佳哉，這種情形沒佇台語創作發生，所以台語小說猶原真有故事性，會當乎人笑、乎人哭，乎人會當綴故事內底的人物當齊經歷一寡代誌，所以會當乎人深刻的反省佮思考，因此透過讀小說，增加人生的體悟佮智慧。

 綾子的作品就誠有讀小說的趣味性，每一篇攏親像看一齣電影彼款，遐爾精彩，遐爾感動，遮故事攏是發生佇阮生活佮土地頂面，所以嘛表現出咱這社會的問題，這是對人民無限的關心佮疼痛。綾子會當寫出好的故事、感人的小說來反映時代，堅持著一位作家的職責。

 綾子真的是我看好的台灣作家，準若欲對伊講啥，就是：下一本小說，敢會當莫擱乎我等十三年啊？欠缺綾子的作品，會是台灣文學的遺憾。