培養對性命的尊重 

最近新聞定定報導囡仔被虐待受傷壘壘，也有父母帶著序細自盡的代誌，使人心寒、毋甘佮感嘆。虎毒無食親生囝，彼種父母的心態是按怎，予人歹了解。

我想咱人自細漢並無培養對每一個生命的尊重，無眾生平等的觀念，誤認人是萬物之靈的真實本意。

人是萬物之靈，並毋是講：天地間人是萬物的主宰者，萬物為我所用，由我來支使，對萬物有生殺之權。

假使一枝草、一欉樹，咱看未合意凊采（隨便）攏會使除掞掉。一尾蟲，一隻鳥鼠，咱看未順眼凊采會使送怹上西天。人類對待動物即款的態度，久來對人的態度嘛會變共款，按呢囡仔參一枝草、一欉樹、一隻鳥鼠、一尾蟲閣有啥乜無仝，扑、罵、監禁、凌治、放拺、屠殺，嘛不足為奇。

唯我獨尊，並無了解人只不過是萬物其中的一份子而已，人的尊貴，人有靈性，是人有憐愍的情操。對眾生會當平等看待，是靈性，是道德。每一個眾生攏向望快樂，無愛受苦，向望活命，無向望死亡。如果咱會當「設身處地」，「感同身受」，互相相換角度來設想，咱就未去害怹，甚至去愛護怹。

當別人對待動物殘忍的時，無啥乜感覺，認為無啥要緊。有一工，傷害人、殺害人，將人當做動物按呢欺侮、橫逆，伊嘛未有啥乜感覺，嘛認為無啥要緊。。對動物的苦難，咱人未有憐愍之心，有一工對人嘛是共款未有憐愍之心。咱看大隊人馬追捕流浪狗，彼種殘酷暴力的畫面，就會當體會米國911恐怖份子殺人的手段有啥乜精差。

自細漢，就愛培養對所有性命的苦難起悲愍心，尊重好生畏死性命的本能。2007.02.05.