束　縛

一個名叫王登的人，厝裡真散赤，散甲食無三頓飽，父母早就過身，無親無情孤一人，伊想欲去問佛祖，為啥乜我哪會赫散咧？

行啊行，行到半路，拄著土地公，就問：「啊！土地公伯仔，我哪會迹散咧？我即陣欲來去靈山問佛祖，汝敢會當先共我講，我即世人並無做啥乜歹代誌，為啥乜會迹散咧？」土地公講：「汝這算啥？汝才窮即世人，我做土地公做了百外年嘍，規工坐踮遮，一日到暗就聽著信徒來哭窮哭苦、哼東哼西，逐家苦情一大堆，我頭殼抈咧踅強欲致著憂鬱症。按呢啦，汝若是揣著佛祖，拜託汝幫我請示看覓，我做土地公赫久嘍，是按怎神的階級攏無升，當時才會升做天神或者成仙？」

王登繼續起程，半路拄著一個員外，員外講：「聽講汝欲去靈山共佛祖請敎問題，勞煩汝幫我請原佛祖，我的查某囝為啥乜到今亦未曉講話咧？是按怎自伊生落來就毋捌開喙講話。」王登嘛答應好。

閣行，佇欲過溪的時陣，拄著一隻龍，龍講：「汝欲過即條溪，我會使揹汝過，毋過有一個條件，汝幫我問佛祖：我的兄弟是一個一個高長大漢，唯溪裡游到大海，隨變做龍王子，干礁我的頭真大粒身軀真細，無氣力游到大海去，這是啥乜緣故？」王登嘛答應好。

經過千辛萬苦，盤山過嶺，王登總算見著佛祖。祖佛煞共講：「一個人干礁會使問三個問題，未當問第四個問題。王登一想，害啦欲按怎好，土地公一個問題、員外一個問題、龍閣一個問題，閣加我家己的問題就有四個問題，總是愛有一個人的問題放棄，我已經攏答應別人，只好犧牲我家己的問題，就幫土地公、員外、龍向佛祖請教，佛祖一一詳細答覆，伊得著答案就啟程轉來。

王登先去土地公遐，共土地公講：「佛祖講，是按怎汝未當升較懸的職位，因為汝定定跤底踏兩甕的金銀毋願放，逐工未放心彼兩甕金仔，貪執的神欲安怎會當升級做較懸級的神。」土地公猛然大悟講：「我無愛遮的物件，攏送予汝好啦！」一跤踢破金銀甕，土地公隨升天去了。

王登閣去揣彼尾龍：「佛祖共我講，汝一工到暗想汝頭殼頂彼粒明珠，愈想明珠，頭就愈大粒，身軀煞愈來愈勼愈細，才會無氣力游去大海。」龍聽了將明珠送予王登，頭殼連鞭變小，身軀連鞭展大，一睏仔道游上大海去。

上落尾王登去員外兜，無疑誤員外的查某囝唯外口雄雄走轉來通報喝講：「逐家來看喔，王登轉來啊！」員外足意外閣足歡喜，查某囝總算開喙講話，問了原因，原來佛祖講：等甲員外的查某囡若是拄著伊的翁婿就會講話！」員外當然一聲就答應，將查某囝嫁予王登做牽手。

這是講古，伊的意思是啟示咱眾生的特色是「執著」，若放未下，就予執著的境界束縛稠咧。當汝徛踮遐，汝的跤毋願舉懸踏出去，汝永遠也是徛佇遐；只有跤舉懸踏出去，一步一步甲踏出去，就會向前行，汝愛放棄原底即一步，才會當閣向前一跤步，汝放棄即一項，才有可能跁（爬）上閣較懸的階層。

汝合意某一個人、某一件代誌、某一項物件，一直想欲挃，得著無想欲放，失去閣苦苦惱惱，奚就是汝煩惱的因，因為汝執著毋肯放，心就予縛去，未得春風自在。

咱缺欠智慧，使予咱產生貪愛的心理，一旦被貪愛的心染著，就像予強力糊粘著剝未開。可見束縛是唯執著而來，執著是對「無明」無智慧而來。無明毋但產生貪愛，亦會產生瞋恨。愛，好甲綿死纏，愛失去，恨未得報復，共伊碎屍萬斷。一個無熟似的人，咱對伊未有特別的反應。假使參咱戀愛結婚，甜蜜蜜，一工感情破裂，愛人變仇人，恨未當伊死。

知影束縛的原因，咱才有法度去進一步去敁縛（解開綑綁）。

註：王登的故事取自普獻法師的著作《慧命常青》