伊生做非常嫷，連上嫷的仙女佮伊比嘛輸三分，伊的身材、外表、對答、接接、內才予見著伊的人心肝頭攏會撲撲跳。

     可是，伊二十外歲仔就剃度出家，雖然減少了秀麗的頭毛，穿著樸素的衲衣，猶原赫呢清秀，赫呢嫷。伊佇某一間禪寺，參二十幾個比丘依止一位老和尚學習禪定。

    因為伊生作太嫷咧，煞予彼二十外個比丘分心，造成修持的障礙，甚至有人為伊所迷，胡思亂想。就有一個佮意伊的比丘，佮意甲忍袂椆偷偷仔寫一封情批予慧春，私約伊欲見面。

    慧春並無回批，嘛無拍青驚伊。等待有一工眾人佇禪堂打坐，恭聽了和尚開示，慧春比丘尼突然間徛起來，對著寫在坐的比丘講：「來啊！你若成實赫佮意我，即馬就出來共我抈咧阿！」

     自彼擺開始，所有的比丘予伊這一喝，親像五雷蓋頂，妄想予拍一下驚死了了，心專注一境，正念分別，入禪定。逐家越愈敬重伊，生起清淨的敬意。