治療悲傷 

喪親之疼，尤其是意外雄雄過身，感覺像心肝夆裂破做兩爿，規個人跋落去萬丈深坑。欲按怎行過即款深沈痛苦悲傷的坑坎（溪壑），上重要的是，需要朋友的諒解、愛佮支持。 

對喪親者本身，首先是愛去接受死亡的事實，毋通隱瞞、壓制自然流露出來的悲傷。假使事前對伊有所缺欠，按怎彌補消敁（thau2 排解）即份自責、罪惡感？後悔是有必要的，每一個人並毋是聖人，難免有不足的所在。觀想伊肯接納咱，聽咱講出對伊的抱歉佮遺憾，講出伊的好，表達咱對伊心中的愛，相信伊會原諒咱。 

有時咱愛想：我按怎才會當予伊快樂、安心，我即馬閣會當做啥乜代誌予伊歡喜的。伊一定希望我會好禮仔照顧家己，行入人群做想欲做的代誌或者學習新的物件。嘛會使共亡者講：我放下了悲傷佮痛苦，嘛希望汝會當安呢，我會堅強活落去。 

接納家己悲傷的感覺，悲傷是愛一個人無法度避免的經驗，是正常的過程。哭，毋是軟弱，是自然的流露。停止悲傷，並毋是無愛伊啊，干礁回轉來正常的生活。 

咱愛知，親人的別世是無法度避免的，會當唯悲傷當中復元也是無法度避免的。只要咱有勇氣，總會有一種力量佮朋友的支持予咱行過即段艱苦的過程，就像規座森林火燒，化成平地，上尾仔也會茁穎發芽蓮花化身（浴火重生），毋管偌呢仔痛苦，也會繼續生湠。 

人，有別世，是無常的展現。出離痛苦到安樂，也是無常。無常，正港是人世間的特色，人世間的一切攏受著無常的支配。環境一直咧變化，世間並無永遠的快樂，娑婆世間是無圓滿的，才著有透底遠離病苦、輪迴的教法－苦、集、滅、道。2007.04.11. 

 ───改寫自《假如我死時，你不在我身旁》，作者克莉斯汀．龍雅可/著，譯者：陳琴富，出版社：張老師文化