大徒弟先去化緣，毋單化無物件，閣無代無誌予阿婆罵一睏閣趕伊走。換小徒弟去共阿婆化緣，無疑悟阿婆對小徒弟煞足好禮，真歡喜送伊一堆柑仔。

大徒弟、小徒弟仙想都想未伸，兩人參阿婆並無相捌，兩人所拄著的卻是無仝，是按怎咧？真奇怪。

等師父打坐完，徒弟就請示師父，師父就笑笑講：恁二人佮阿婆宿世的因緣無仝，當然遭遇嘛無仝。恁前世，有一個婦人人因為家境散赤，姑不而將去偷提一戶好額人果子園的水果欲止饑，煞予人掠著扑甲半小死，閣夆掞踮路邊哀哀叫，引起一大陣人圍咧議論。拄她二兄弟經過，阿兄講：「做賊死好，報應！」小弟講：「唉！伊足可憐的，希望伊毋通閣共偷提物件」，小弟閣助贊伊淡薄所費予醫傷。彼個偷人物件的人就是田裡的阿婆，恁就是彼二兄弟。

如是因，如是果；行動（身）、講話（口）、心念（意）的力量不可思議，因、緣、果的力量牽引久久長長不可思議！

化緣２

佛陀佇大路乞食化緣，伊的袈裟敆紃（接縫）必裂（裂開）去，弟子想欲幫佛陀補紩（縫補），佛陀毋肯，逐家無了解佛陀的意思。

無偌久，逐家就知影佛的深意。因為佛陀一直行一直行，有一個足散赤的老婦人人，看著佛陀的衫必裂就發心補紩。其實講，幫佛陀補衫是伊唯一會當布施的能力佮機會，老婦人因為即份福德因緣，來世會當投生兜率天享福不盡。

原本，出家人化緣並毋是募化金錢，是為著僧團的需要－衣、食、臥具、醫藥向在家人勸募，並且應用化緣的機會行入人間結法緣、說法度眾。

佛度有緣人，化緣，結一個化度因緣，結一個佛緣、法緣、僧緣。化緣，化一個親近三寶、累積福德的因緣；化一個正念正行，得度生死，成就菩提的因緣。