學佛手記

1.家己 

世界上大的敵人就是家己，假使戰勝了家己便是天下無敵手。貪的念頭生起，隨去共滅除，氣惱的念頭生起，隨去共滅除。會當戰贏家己的歹念頭，這就是戰勝家己。

世間上歹降伏的是家己，往往攏會袒護家己、放盪家己，做毋著毋肯承認閣怪責別人。換倒轉來，別人做了毋著，咱攏隨去指責伊，愛伊認錯改過。講別人較簡單，檢點家己較困難，上痞教示雕督的，毋是別人，是咱家己。

會當教示雕督咱家己，才會當做一個好人，好行為的人，經過教示雕督的人，是一個有光明前途的人。家己，才是上會當倚靠的人，別人毋是咱永遠的倚靠，上靠得住的是咱的人格、學問、修養。肯克苦耐勞，才是家己上好的倚靠。

每一個人攏有伊最後的歸宿，做痞，就有痞的歸宿。做痞的結果，一定會拄著悲憂苦惱；甭做痞，就未有悲憂苦惱。往往咱拄著悲憂苦惱，攏是牽拖別人害的，其實是家己做得來。

干礁為家己利益設想的人，是無清氣相的人。做代誌有兩種利益，一種是利益家己，一種是利益別人。干礁為家己利益去追求的人，是自私的人。貪心、佔便宜、無平等、毋肯施捨人，是無清氣相的人。

品行好的人，一定會雕督家己。好人有二種，一種是智識好，一種是品行好。智識好，品行無好的人，未當算做是好人。好人，一定愛智識好、品性好。愛品行好，一定愛時時刻刻雕督家己。

會當保護家己的人，才會當保護家己的某囝、田園、財產。做痞代誌的人，未當算做是保護家己的人。未去做痞代誌的人，才算是保護家己的人。

心情未清朗，就是有無明，就是有愚痴，就是內心有貪、瞋、痴。忿怒、嫉妒、未滿足、未感恩等等的念頭，這種歹的念頭，致使受著悲憂苦惱，心才未清朗。去掉無明，心就清。

警策家己，是上好的警策。警策家己甭做痞，警策家己做好代，定定檢點家己，檢點家己的心念、家己的講話、家己的行為，修改無正經的心念、言語、行為。

象去溪仔邊食水，會注意毋通塌落去岸邊的爛土，萬不二踏著爛土，就愛趕緊脫離。外形艷色的物件，好聽的聲音，芬芳的氣味，甘甜的滋味，就親像是窟仔底的爛土，愛細膩毋通去磕著，若毋是勢陷入去，就愛緊緊走脫，，才未愈陷愈深，若是愈陷愈深，就愈無法度抽退。

愛保護家己的身體，保護咱甭閣辛苦病疼，甭閣受災殃，甭閣做痞代誌。若無按呢來保護家己，一定會生出真濟苦惱。做一個別人歡喜接近的人，就應該共好的代誌、好的人格、好的智識，加自咱的身上。甭共歹事、惡事加踮咱的身上，因為若共歹事、惡事加自咱的身上，就會使人討厭。

      家己愛知清楚按呢做是無好的，就應該責督家己甭做，親像做空課無盡力、講話無文雅、行為無正經，這攏未使閣去做。