你平安去，我足歡喜──予鐘局長

雖然你做空課真頂真，嘛做甲郵局支局局長，服務客戶是一流，通人呵咾無人嫌，可是久年的氣喘，老來閣致著肺癆，去榮總蹛院二禮拜，身體像水崩山，身體一日不如一日，控制較好勢才轉來。無偌久，久年的氣喘夯起來，緊緊送病院。

彼工，醫生講危險，蓮友去關懷助念，你嫌吵，一班了後就講免，我猶是專工去看你，你白白白的頭毛，白白白無剔的嘴鬚，瘦甲皮包骨的身體，使人真心足疼，看你合掌念佛信心堅固，我握著你的雙手，干礁共你講一句話：「西方路上一路平安！」送你一本洪老師的新冊《臨終光明導引》，愛你的千金將ＣＤ放乎你聽，我就告辭。

第二工尾暗，參牽手去看你，你厝內的人已經悿甲轉去歇睏，倩一位看護咧照顧，牽手問你知影我是誰無？你意識攏真清楚，手猶原合掌念佛，阮告駕，心內祈求佛慈保庇安祥隨佛去。

透早欲出門上班，助念團電話通知你拄過身，心內感嘆無常摧逼，但並無意外，經常探視臨終病人，亦是足歹判斷閣偌久會別世。軀體若敗害，人予拖累是真艱苦，上驚治未好死未去，像植物人，另外是病甲痛疼難當，無人可代替，足可憐，死也是解脫。

人的命像氣息爾，三寸氣毋來，不管任何英雄好漢，共款未振未動，比一尾刺毛蟲也較不如。定定有人講「人定勝天」，無論伊是按怎了不起，臨命終，即一口氣欲出欲入伊敢有法度控制自如？敢有法度控制生死？生死自在，愛來就來，愛去就去，遊戲人間？

你後生電話揣我鬥相共後事，尾暗下班了去看你，助念團已經助念完八點鐘，智覺寺兩位師父拄咧共你念佛開示，看你嘴仔小可開開，目睭小可金金，面憂面結無好看，毋甘的心緒浮踮心肝頭。約定暗頭仔九點，欲參詳後事喪儀的代誌，你後生講日子看好矣，明仔早入木，下晡火化，後禮拜二舉行奠禮。

暗時九點來恁兜，蓮友講會然法才來過拄拄走，一時仔囝，信願法師佮一堆蓮友到位。法師是來虎尾講經，智覺寺師父禮請法師幫你開示，法師是臨終關懷的專家，伊助念開示超過一千擺以上，師父看你的面貎，摸你的手板，發覺你臨終並無順利。念佛當中，法師去瞭解你的生平狀況，才閣轉來對你可能的執著，一一開破、勉勵，愛你一心歸命、念佛。念佛大約四十分，開示足足二點外鐘。

聽開示才知影透早臨終的時，親人無佇身邊，一番急救，命救未轉來，一箍人折磨甲走精變款，痛苦的表情浮踮面。法師聽著明日就欲火化，建議毋通。法師離開了後，參恁家屬談論後事奠禮喪儀一寡代誌，明日火化的代誌，一時予規家伙真躊躇，討論的結果，決定照預定入木火化，因為上師有來過，講24點鐘過，火化無要緊，也驚肺癆會傳染。我安慰講檢採仔明仔早起就有瑞相現前。

隔工尾暗仔下班，我去恁兜，你已經化為骨灰囥佇甕仔底。你查某囝講早起四點外，你現景予看，看著佛光普照，你安祥隨佛往生去，你的面色變紅霓，規身軀柔軟，予家屬放下了掛煩，也對佛的慈悲感恩不止，你會當學佛念佛往生佛國去，是念佛人上向望的福氣，你在生種著真濟的福德因緣，如今花落蓮成。

下盈助念團來誦經念佛，阮逐家用最虔誠的心，拍法器用上細聲，念佛的時盡量無動法器，煞板的時閣聽十外分鐘洪啟嵩老師《臨終光明導引》的ＣＤ開導，盈佛念了真好，逐家攏法喜充滿，諒必你也是，阮知影你平安西方去，感謝佛恩的目屎滴胸前。