吞銅食鐵

法庭上，法官問賊仔講：「汝偷掠人的鵝仔的時，敢無看著主人佇邊仔。」

賊仔講：「無咧，我干礁（只有）看著想欲偷提的鵝仔爾（而已）。」旁聽的人一陣笑聲，法官、檢察官攏搖頭。

囡仔共手伸入去闊喙的玻璃罐仔提糖仔，手煞會得入、未得出，佇遐咧哀哀叫、哭佮啼，阿母講：「汝手掟（握）傷濟（多）物件，掟較少咧，就伸會出來。」

想起古冊《列子》內底，講著「齊人搶金仔的故事」，內容是按呢：

有一個齊國的賊偷，想欲得著金仔，想甲欲起悾就去金仔的店搶人的金仔，後來夆掠去官府嚴辦。官府問伊為啥乜（什麼）敢佇耳目昭昭，光天白日之下搶人的物件？

齊人的賊偷回答講：「我無看著人，嘛無想講會去夆掠著，干礁看著金光閃閃的金仔就想欲去搶過來。」

人，貪圖名利、私慾，就迷失去家己的心智，做代誌觀前無顧後，致使帶互家己未當預測的傷害。閣較可嘆的是，有的政治販仔，做了大官，換了心肝，當利益、私慾現前，煞未記得早前咒死絕誓，不貪不取、清廉為民的信願、承諾。