回「參快樂相閃身」應當大大歡喜 

話頭：朋友來批講愛共翁婿鬥創穯頭，早早歡喜咧期待一個月一擺的讀冊會煞臨時臨要未當參加，啊！「參快樂相閃身」。我想，除了想辦法將讀冊會狀況錄音之外，嘛回批共伊安慰勉勵。 

會當佇厝無閒嘛是快樂，我幫汝揣快樂的理由，希望汝喙笑目笑歡喜鬥做穡。 

一、    最近紡是縣長好意公費換喙齒，才會迹無閒，咱愛為咱選出來的人會當愛護百姓，咱的眼光佮選擇真瓚，應當大大歡喜。 

二、    因為按呢，咱兜的生理加倍好，嘛加趁淡薄收入，真好！景氣迹痞，咱有迹好的機會，應當大大歡喜。 

三、人伊就開金口請汝幫忙，當伊有困難的時，本成就是愛互相扶插，會當為家庭盡本分，盡著賢妻的責任，應當大大歡喜。 

四、不管出門參加讀冊會會偌快樂，為著家庭和樂，犧牲家己，嘛是互囝、互翁婿一個好模樣，應當大大歡喜。 

五、人啥乜時陣、啥乜代誌愛提起佮放下，愛有智慧來判斷，肯克制家己的欲求，這就是大修行，修行的功夫是佇關鍵的時陣做出上好的決定，未痞，修行有寥寡進步，應當大大歡喜。 

六、人欲有好緣，愛多結善緣，佈施波羅蜜，將穡頭的物件歡喜做，做次序，互用著的人足呵咾、足歡喜。做物件的時

     ，咱就真心共祝福，祝福使用的人平安喜樂，按呢免開錢閣有大功德主好做，應當大大歡喜。

圖是龍崎..夢幻湖