食苦當做食補

外在環境有時未滿咱的意，愛學「用心轉境」，隨境自在。體悟末滿意的代誌，通常有奧妙的意義，會啖著清涼的滋味。

一個人如果會當佇逆境中，發現積極的面向，而且勇敢承擔，這嘛是一種覺醒，因為按呢免去了真濟的怨慼佮煩惱。用心來轉境，將煩惱化做成功的肥底，煩惱生智慧。

愛迪生細漢的時，佇火車頂做報童，伊一面賣報紙一面研究化學，有一擺煞失主意火燒，車長出大力巴伊一個喙酺（phe2），耳孔鏡煞破去變成臭耳聾。

    有的人拄著即款代誌可能含恨一世人，怨天慼命哀哀唼唼問是按怎是我？怹煞逆來順受，發現予伊的意義。伊後來變作一位偉大的發明家，有一位朋友提起即層代誌，表示足可惜，如果伊無變成臭耳聾，伊的成就一定閣較大。伊煞回答講：「臭耳聾有啥乜毋好，我顛倒閣較專心，嘛未聽著別人咧盤喙唇皮講閒仔話，避免一寡是是非非。」

隨境自在，是甭予境界來左右咱的情緒，不管時攏會當做家己的主人，才會當優遊自在，歡喜滿懷。英國文豪莎士比亞對拄著困境看未開的人，伊講：「歹運去予強徒搶劫，咒天咒地記恨在心，毋但失去被搶去財物，也搶去心境的安寧。」

人拄著逆境，當然會艱苦，這親像夆射中著第一支箭，紲落來的怨嘆艱苦失志，就親像夆射中第二支箭，第三支箭，第一支箭是來自別人，無法度選擇。第二支、第三支卻是家己射家己的，是家己咧折磨家己，這是咱會使掌握、操作，咱何必自揣罪苦，家己討皮疼，家己捙跋反。

有一片動畫影片名叫「哆基朴的天空」，是發覺性命意義的影片。哆基朴是一垺狗屎，伊佇無意中予一隻狗仔放佇一條大路。有一個做穡人駛牛車經過，牛車頂載規車的砂土，忽然間有一堆土丸落踮土跤兜，做穡人無隨發現，牛車繼續向前行，

土丸仔拄著狗屎，兩人開講著家己的遭遇，狗屎仔講：「伊想欲奉獻家己，連欲做細隻雞仔的飼料嘛夆拒絕。」土丸仔安慰講：「天公伯仔未無緣無故創造汝，伊會共汝安排甲好勢好勢。」講仔講，閣聽著牛車聲，原來是做穡人發覺有大粒土丸仔落去，閣斡倒轉來，土丸仔足歡喜，土丸仔講希望去田園參田土做堆，按呢會當予五穀、果子生長大欉。土丸仔閣予做穡人抾走去啊，行向伊會當貢獻的田園裡。

自按呢，狗屎就抱著信心面對現實，因為伊知影，天跤下每一個性命攏有伊的性命的意義佮價值。上落尾狗屎揣著伊的性命意義，伊奉獻家己變做小金英（蒲公英）的肥料，予小金英開滿燦爛足嫷足嫷的花蕊，生湠分散佇世界各地。

雖然伊是予人棄嫌，予人看未上目的一垺狗屎，佇人的眼內是卑賤無啥價值，但是伊一心一意想欲貢獻社會，盡著伊的本分，即款的精神真是使人敬佩！2007.1.1.