字體：小 中 大 |
|
|
|
| 2009/06/10 11:27:43瀏覽435｜回應0｜推薦1 | |
| 6月7日，周日。3月份蓋特納接任美國財長，推出量化寬松貨幣政策（去年10月英國已采用）及取消 mark-to-market 會計制度，令美股由3月起狂升，亦令5月份公布銀行業績靚咗好多。到6月初，紐約股票交易所有90%上市股票價都喺50天移動平均線之上，代表短期股市仍有力向上，但唔代表牛市重臨，投資者反而應該步步為營。至今恒指最高系6月3日18967點，系時候放止損沽盤矣，例如訂喺17000點水平。響升市中系冇人喜歡聽忠告嘅，一旦巨浪冚埋嚟，嗰D走勢派嘅言論同分析便有如用沙建成嘅堡壘。事實系：冇人可事前知道頂喺邊度。 商品價格只系技術大反彈 今年首季標普五百估計純利下跌35.6％（與上周一樣），依家當中四百九十二間已公布業績，66％較估計中好、9％和估計相同，其余低於估計。以2009年估計純利計，標普五百P/E十五點一倍；第二季純利估計下跌36.1％（1月份估計跌11.3％，4月1日估計跌31.7％）；客觀形勢仍在惡化。今年3月9日開始股市回升，系因為極度超賣，而非企業純利開始回升。據彭博資料，去年8月至10月有700億美元由MSCI 遠東（唔包括日本）股市流出，今年4月中開始又見上述資金回流，並以5月份為最。上述700億美元回流，支持5月份 MSCI 遠東指數上升，至今已升50％，6月又點？要睇有冇新資金流入而定。各位要明白，去年8月至10月資金流出令 MSCI 指數跌60％，至今 MSCI 指數仍未重返去年8月水平。CRB 路透／Jefferies 指數5月份上升14％，系三十四年來最大升幅，又或1974年7月以來最大升幅，代表2008年年底過分超賣，家嚇重返正常。銅價今年升65％、油價升54％、大豆22％，全球股市上升超過30％、金價升12％（成為大落後者）。除黃金外，其他商品亦系一次技術大反彈。 6月1日通用汽車宣布破產，因負債1728億美元，資產只有823美元。百年老店如缺乏效率，一樣可以破產，亦證明咗就算長期持有一百年，一樣可以損失慘重。作為投資者，一旦發現投資方向唔正確，唯一可做嘅事就系止蝕，而非死守。賺大錢唔系來自 Work Hard 而系 Work Smart。2007年11月美國出現金融危機時，曾產生七個黑洞──一、房利美；二、房貸美；三、雷曼兄弟及其他投資銀行；四、華互銀行；五、AIG；六、花旗集團及其他銀行；七、通用汽車。當通用汽車宣布破產後，上述七大黑洞起碼已處理了，美國會否從此進入復蘇期？睇落又未必。今日美國開始進入「十年生聚、十年教訓」期，有如大病一場之後，雖然已離開 ICU返回普通病房，但仍然系病壞一個。 美國全國經濟研究所商業同期測定委員會負責人 Robert Hall 認為，由2007年12月開始嘅衰退喺今年3月進入低谷（Trough），今天仍太早去決定呢個低谷到底系浪底，抑或系一個漫長衰退期嘅短暫反彈。估計美國今年第二季GDP只會下跌1.9%，較去年第四季及今年第一季溫和，但唔代表衰退已經過去。 量化寬松貨幣政策穩定咗經濟，令美國今年第二季GDP唔再大幅下滑，令債務通縮風險受到控制，至於經濟能否復蘇又系另一回事。呢次由量化寬松貨幣政策帶嚟嘅經濟平靜期可維持幾耐？無法事前估計。有人認為，當十年期債券息率上升到4厘以上便完成，但亦有待事後證明。換言之，量化寬松貨幣政策並冇解決CDO危機，只系令債務通縮風險暫停，同時令美滙指數跌至七個月內新低。如上述辦法真系可行，日本就唔會出現長達十三年（1990至2003年）嘅衰退啦。 股市幻象建基於美元危機論 過去二十六年，西方國家政府同人民皆習慣利率及通脹率齊齊回落；2007年8月出現CDO危機後，西方國家政府以財赤去對付信貸壓碎，可以成功嗎?!西方國家經濟能否逃過1990年代日式經濟嘅慘況?!未來十八個月美國政府須發行5萬億美元新債，未來十年美國政府每年支付利息超過8000億美元（如長債息率喺5厘左右），呢種情況可維持幾耐？3月9日至今道指已升42%，標普五百升33%，恒指升60%……。3月9日青姐流淚了，股市上升了；今天人人都在笑，認為牛市重臨了，我老曹在此只有祝君好運。道氏理論大師 Richard Russell 認為，依家仍系熊市二期，你同意嗎？世上冇另一個人夠 Richard Russell 咁老資格去演譯道氏理論（我老曹嘅道氏理論亦由佢所教也）。 中國制造業訂單自今年3月起止跌回升。5月份采購經理指數系53.1（4月53.3），已重返50點之上，即進入擴張期；生產指數57.4（4月56.9）、新訂單指數56.6（4月54.6）、出口訂單指數49.1（3月47.5），有理由相信中國制造業正進入反彈期。但由於外圍環境仍差，未知呢次反彈可維持幾耐，但已引發新一輪炒賣工業股潮。 內地新股上市經過八個月停頓後，6月至8月共有三十三只IPO集資130億元人民幣，估計將令A股進入調整期（但跌幅應該唔大）。 許多時投資者只見到佢地所希望見到嘅，而非真實狀況，此乃經濟不斷惡化情況下恒生指數卻由3月9日起急升嘅理由。對前景嘅期望令恒生指數響今年6月3日升到2007年12月以來最高。換言之，今天股市上升只反映投資者對未來嘅期望，而非真實情況。股市出現嘅幻象，系建基於美元危機論。由3月起到6月初美元滙價不斷回落，推動商品價格上升及「再膨脹論」，刺激新興市場股市上升。美元由去年7月走強，到今年3月結束；呢次美元滙價回落，到底系調整還是另一次美元危機?!如今年下半年美國經濟繼續下滑，小心美元到6月份又再次漲起來。如有美元危機，中國將系最大虧損者，中國為阻止人民幣太快升值，不得不大量購入美元，結果進一步泥足深陷，此乃中國希望人民幣成為國際流通貨幣嘅理由。如中國響呢方面跑得太快，可引發美債泡沫爆破，呢個市場市值65萬億美元，較美股嘅市值仲要大！ 高盛估計，今年3月起美元將進入漸進式貶值期，一直到2011年才完成整個貶值過程。標普認為，美元雖進入漸進式貶值，但貶值幅度同速度都唔會大。6月1日美國財長蓋特納向中國政府保證強勢美元（5月份美元兌加元貶值14％、兌歐羅貶10％、兌澳元貶11％、兌日圓貶7％）；美國銀行與美林則認為美國政府采用量化寬松貨幣政策，引發通脹疑慮，令資金由過去防禦性債券市場撤退轉向新興股票市場，系美元3月至5月急劇走弱嘅理由，隨住油價大幅飆升，進而引發全球通脹憂慮；小心美元貶值潮有可能響6月份結束。 依家我地面對嘅只系「超級市場通脹」，因為基本消費要求例如食物、日用品並冇減少，供應商仍可透過加價維持利潤，然而一切非基本需求都在跌價，因消費者已負擔唔起非基本用品，因為愈來愈多人失業，又或喺2007至08年投資上損失慘重。至於原材料今年漲價亦只系大跌後嘅反彈，唔代表另一次漲價潮開始，因為全球經濟在萎縮中，企業純利亦在下降，全球銀行業更在收縮中。 投資者應學習喺牛市中賺錢、響熊市中發達（喺牛市，股價上升速度十分慢；而熊市反彈，郁嚇都上升100%）。相信未來日子將有愈來愈多人有興趣捉熊腳。 中國未來經濟系海歸派手上 經過2007年11月起嘅 CDO 危機後，希望大家從中學到教訓：一、熟悉陷阱（Familiarity Trap）。即去年投資滙控（005）而損失慘重者所犯嘅錯誤，自以為對滙控好熟悉，其實卻系唔識。二、近視（Money Myopia）。因銀行息口咁低，而購買雷曼債券、精明債券、股票掛鉤債券、外滙掛鉤債券等，只為收取可觀利息回報，而忽略風險。三、投資慣性。例如1982年起我老曹每月一金幣計劃；2007年11月後仍有唔少人按月將部分資金用作買基金，結果愈買愈低。呢類按月投資法，我老曹一早已叫投資者放棄，估唔到至今仲有咁多人采用。四、鐵達尼號候群癥──以為架船咁堅，點會沈？因而忽略所有危險訊號。經一事長一智，希望各位日後唔好再犯上述錯誤。 美國由1966年至今，制造業占 GDP 由20％下降至2008年12％（香港則由1980年占 GDP 28％下降到2008年只占4％）。上述情況亦喺中國開始！我地必須接受中國由出口導向型經濟轉由內需帶動經濟復蘇，即呢次中國復蘇將好痛苦而漫長，例如行三步退兩步，再唔似過去三十年咁可以一口氣上升。 中國1978年實施改革開放政策後，產生好多億萬富豪，大部分文化程度唔高，但十分註重下一代嘅教育，唔少高中已送子女到國外讀書，到海外留學。呢批第二代嘅知識水平達國際級，視野遠遠超過父輩。佢地回歸後，正逐步成為企業嘅第二代掌門人。 須知道創業難、守業更難，呢批海歸派從父輩接掌企業權力後，有部分十分重視團隊意識，溝通能力強，加上知識面廣兼有國際視野，可以把家族企業發展成上市企業。但亦有D海歸派由於缺乏領導經驗及威信，實施從海外學番嚟嘅管理技巧時，面對來自家族嘅阻力，無法一展所長，唔少變成遊手好閑，只求吃喝玩樂亦大有人在。未來三十年中國經濟會走上哪條路？將由呢班海歸派能否成功接管家族企業決定。
|
|
| ( 時事評論｜財經 ) |
