第一屆海翁文學獎首獎

電扇風、拉吉歐含一台掛賴搭(light)的鐵馬這三項物件，是阮囝仔時陣庄裡若有人嫁娶的時，上蓋有面子的嫁妝，嘛攏互阮當做囝仔歌來唸；呣過，今旦日我卜講的唔是電扇風亦是拉吉歐，是卜講阮阿爸迄台掛賴搭(light)的的鐵馬。

自我有記持以來，迄台鐵馬就已經定定匟佇阮厝內的中間仔，阮阿爸有時陣用伊做菜車載菜去大市場喝賣菜、有時陣用伊做轎車載我去阿媽兜食腥臊、嘛定定用伊做救護車載我去醫生館看醫生。

我囝仔時陣一直攏治咧佮醫生交陪，因為我佇度晬時小兒麻痺的病毒走來佮我做朋友，雖然我實在真無甲意伊，呣拘伊硬死纏，本來是卜帶我去閻羅王遐，阮阿爸佮阿母捨身放命甲伊拚，則共我對鬼門關搶倒轉來，對鬼門關轉來了後，我的正跤煞袂振動，阮阿爸佮阿母為著卜互我的正跤會當行路，所以三工兩工就愛帶去醫生館互醫生看。有一擺阿爸田裡較無閒，就利用黃昏落工了後卜載我去醫生館，拄卜出門的時，上蓋疼我的三姑拄好轉來外家，問阿爸卜載我去佗位，阿爸共三姑說：「驚醫生沒錢通買菜，捌提錢去互醫生開啦！」三姑伸手將阮袂行路的正跤挲挲咧講：「較過去遐迄條大圳溝有無？等一咧共伊掞互水流去省費氣。」我聽甲心肝有夠驚，疼我的阿姑那會按爾講咧？看阿爸笑笑無講話，我感覺阿爸的表情假若是同意阿姑的建議，是呣是我的跤一直攏呣肯行路，怹就卜共我掞互水流，像對面青仔姆怹兜迄隻狗仔「酷洛」死去的時陣互人掠去放水流按爾咧？我驚甲phi phi 掣，閣呣敢予阿爸知影我咧驚。

天色沓沓仔暗囉，阿爸認真咧騎鐵馬，無拍開賴搭(light)咧騎走較緊，愈倚迄條大圳溝的時我愈驚；提出真大的勇氣，輕聲問阿爸哪無愛切賴搭(light)？我想講騎較慢咧尚少會當較慢到迄條大圳溝遐；阿爸講：「有月娘照路就好！」我心內迄的時陣足慼[tseh4]迄粒圓輾輾的月娘，月娘哪會無愛稍覕一下，歸路一直綴阮行，予阿爸騎赫緊，害我心肝劈波彩；佇咧行到三姑講的迄條大圳溝的時，我實在真驚阿爸真正共我掞落去，偏偏仔即個時陣，阿爸佫將鐵馬停起來歇佇橋頂頭，我抓準阿爸就卜共我放落囉，當我驚甲卜死去的時陣，阿爸慢慢那提一枝薰起來點，原來阿爸是卜食薰，呣是卜共我掞掉，真正是好里佳哉！這是我坐迄台鐵馬印象上蓋深的代誌。

阮阿爸載菜去大菜市喝賣，有時陣菜賣著好價數，阿爸會買一兩塊仔糋粿返轉來予阮厝內六個囡仔公家食，一人分著一塊塊仔囝，阮嘛是食甲足歡喜的；逐擺聽著阿爸的鐵馬聲轉來時，看著大奇菜籃仔內面匟一個外口滲漏油滓tai2的牛屎色紙袋仔的時，是阮一陣囡仔數想歸工得著滿足的時陣；當然呣是定定攏等有食，菜籃仔內面若佫有一堆菜，奚就是菜無好賣，賣無出去，載返轉來家己食，若無就做肥；有一擺阿爸轉來的時，大奇菜藍內面空空，無賰半欉菜，應該是賣咧袂bai2，呣拘那會無買糋粿，是按怎咧？問阿爸，阿爸說是請戴帽仔的（警察）食幾若塊糋粿去啊！為按怎呣甘予阮一人食一塊的糋粿，會請戴帽仔的食幾若塊咧？原來；有月娘就呣免開賴搭(light)是阮阿爸家己規定的，戴帽仔的是無同意的，去予戴帽仔的拄著，予人開紅單的罰金會使買足濟塊糋粿，實在有夠呣甘，閣呣知影卜怨嘆啥乜人，阮只好閣去慼迄粒圓輾輾的月娘！