各位評判、來賓，逐家好，我是囗號，今仔日、我所必(※beh；要也)演講的題目是：『食魚食肉也著菜佮』。

佇(※ti7；在也；發音如箸ti7)咧高雄市大寮區、有一間菜色燒騰騰、芳糨糨(※phang-kong-kong；芳，香也：糨，濃也)兮餐廳，伊兮店號是：「飯是鋼」。這咧店名嘛真趣味擱心適，記者去咧訪問兮時陣，頭家程老闆講：「人是鐵，飯是鋼。」鋼比鐵卡硬；人卡勇，若無食飯，嘛未堪喞( jit )！啊若、嘎若(※只是)食白飯，無配菜，嘛無滋無味。

無毋對！食飯時，愛配菜，但是，醫生嘛講：毋當嘎若(※只是)食魚、食肉、孤一味，嘛愛食青菜，按呢(※這樣)，營養吸收，才會平均。

其實，食飯兮時陣，魚肉匟(※擺放)佮歸桌頂，腥臊、澎湃，遐是(※那是)好額人處內兮食福，毋過，俗語咧講：「食好，享受；食歹，長壽。」

咱今嘛不比較早，較早經濟歹，處邊頭尾、逐家生活艱苦，食飯只好配菜脯。若無過年過節，三頓根本無法度看到肉，所以，拄到親晟朋友嫁娶、予人請，咱著愛挾肉，傷(※泉音siong，漳音siang；極致也)好是三層、肥肉，食予油光滿面，食予救本，佮(kah)五臟六腑補一寡仔，好好啊，享受一下。

但是，現此時，社會進步，逐家攏賺有得(※到也)錢，食穿兮生活嘛已經改善。逐日大魚、大肉，予人食佮(kah)攏會惊。今嘛，逐家傷(※極致也；太過)大箍(※腫胖也)；惊高血壓，惊糖尿病，惊身體拍損；講較白啊，就是惊死！ 

咱今嘛食飯若出家人，食菜爾！阮學校兮ㄐㄧㄡˋ桑（※張先生的日文發音）就講：伊今嘛若牛，食飯嘎若(※只是)食草，「一碗飯，兩碗菜湯。」希望按呢會當食到百二。 

正確兮！江湖一點訣，講破毋值三分錢。身體愛勇健(※健，發音如件)，咱就愛加食蔬菜。若無，就親像鄭成功兮大囝、鄭經、鄭仔舍(※舍，「少爺」二字合音連讀)，歷史上記載：鄭仔舍愛食好料，逐日魚佮肉，從來毋食蔬菜，結果，得著痔瘡，甚至，最後到尻川(※尻川，臀部也)流血不止，煞來過往，伊真正是死佮真歹看。真不值！莫怪咱府城俗語講：『食魚、食肉、也著菜佮。』 

『食魚、食肉、也著菜佮。』這句話嘛毋是嘎若(※只是)表面上所講兮爾爾！實際上，伊也有：代誌必(※beh；要也)成功，就愛逐家互相配合，互相湊相工兮意思。

是價值連城兮山珍海味嘛好，是一Cent五厘兮菜脯蔭瓜也罷，攏愛食，胃腸才會好，身體才會健康，未發(※音如潑)病。

仝款，咱若必做大事業，著愛朋友廣交，誠心對人，予五湖四海兮兄弟攏來佮咱湊腳手，是關公、張飛這款兮虎將介好，是廖化、周倉這款兮先鋒嘛未歹。

想看嘪(※mia3，語氣助詞)兮！佗(※何也)一件代誌(※事情)毋是逐家兮氣力作夥來完成！親像拍野球，有Pitcher投球，嘛愛有捕手承(※接也)球，若無，逐粒、著漏接，較厲害兮球隊嘛愛「美國西裝––大Suit(※諧音輸)」。

亦擱有，扮戲兮時陣，台頂兮小生小旦企中央，演佮傷心目屎流、或者是糖甘蜜甜大團圓，有當時啊，嘛有丑仔出來，挹(※引也；灑也)淡薄仔味素，滲(※透也；入也)一寡仔笑詼，歸齣戲嘛才有起落佮看頭。

啊，這就是『食魚、食肉、也著菜佮』嘛！大細仙菩薩，攏嘛真神勇，大細項物件，攏嘛有路用。配合兮好，上天收妖，下地災難全部消；啊若配合未好，人未行，車未駛，啥物攏未使。一切歹發落！

各位，人咧講：「一理通，萬理通。」所以，國家必強，政府必讚，毋是嘎若(※只是)頂懸兮總統、市長好爾，嘛愛下脚底，環保局兮、清潔隊員認真服務，士農工商每一位小市民盡本分，逐家照紀綱行；若無，拉颯(※汙穢也)無人收，社會攏總是垃圾，逐家嘛未好食睏。 

最後，我必講，佇社會上，毋管咱是有才調兮魚、肉，或者是開脾助味兮青菜，攏愛尊重別人、嘛未使看輕家己，因為，陰陽乾坤、兩儀才會當合成太極；逐家，作夥打拚，爾扶我，我扶爾，魚幫水，水幫魚；逐家相招來幫贊，才有咱漂暼兮好江山。 

我兮演講到這結束，感謝各位，勞力！＃

※台南一中張力中老師撰稿；為學生參加河洛語演講而作