(相片取自許居士部落格)

紳士e形影─懷念蘇金順理事長

2002年感覺家己對台灣文化佮台語文e生疏，去虎尾社區大學親近廖進雄老師學台語文。開課彼一工，廖老師e老師─雲林縣臺語文研究學會創辦人蘇金順理事長來致詞，理事長講：會曉來學台語文e人眼光看真遠，因為台灣e未來真值得期待；擱講過去所學e學問有百分之八十會使轉換做台語文，其他百分之二十愛靠家己下功夫。到這陣，抑擱會記哩理事長鼓勵晚輩e言語，面裡慈善e笑容。

2004年，計畫欲邀請雲林縣臺語文研究學會來社區電台開闢一個台語之美e節目，拜訪恩師廖進雄老師佮當時e總幹事許立昌科長，嘛敲電話拜託蘇老師鬥促成，老師真歡喜，答應欲鼓吹這些台語文e先進輪流來主持，「用心愛台灣」e節目到今嘛八、九年猶原咧進行，積極推展優美e台灣語言佮文化。

雖然因為時間上袂拄好，無正式加入臺語文學會，毋過自2005年著開始加減投稿《雲林臺語文研究學報》，定定受著這些台語文老師無私e指導佮牽教，發表佇學報e詩詞擱予簡上仁老師提去譜曲，自安爾開始詞曲合作e機緣，尾手會去中正大學進修，提著台灣文學研究所碩士學位，嘛是受著雲林縣臺語文研究學會e鼓勵佮栽培。

有一冬過年，去虎尾寺拜拜出來，坐佇車頂拍方向燈按算欲起行，看著一個頭戴氈帽(註1)紳士e形影，擋恬(註2)欲等伊先過，紳士擛手讓我先行，近看才知影是蘇老師，驚影響交通毋敢停落來，共伊行一個禮，伊無定袂認得我，毋過慈祥e笑容，若像寒天燒烙e日頭。

兩冬前，聽講蘇老師身體狀況無樂觀，頌《藥師經》回向予伊，祈求伊無有病苦，早日恢復健康。舊年二月，慈濟電視台來採訪，蘇老師精神真好；八月參加學會成立十周年紀念大會，擱真歡喜致詞鼓勵逐家，想袂到過一冬，聽著蘇老師離開e消息。八十六歲雖然算真長歲壽，心內總是真毋甘，感謝伊學校退休了後，用心研究台語注音音標系統，無私奉獻開創雲林縣臺語文研究學會這片林園，栽培這爾濟台語文e傳播者，相信理事長佇別個法界，仝款面帶笑容，永遠守護著優質e台灣文化，紳士溫暖e形影，永遠佇咱e心肝內。

註1：音tsinn，同晶，毛質或呢製的帽子。

註2：停下來。

( 2012.08.05)