醫療印象

讀國小的時陣,有一個同學急性盲腸炎去病院手術,參另外一個同學予老師指派,代表全班去病院共探病。會記哩一入去病院著有真重的消毒水味,櫃檯邊擱有兩三個玻璃甕仔,內面有無夠個月的紅嬰仔標本,真正恐怖,自安爾對病院無啥物好感。

大漢了後,雖然毋捌擱看著恐怖的紅嬰仔屍體，毋過病院同款予人無平安的聯想,除非是去婦產科看親友,才有可能會有歡喜的感覺。

台灣的醫護人員上班時間實在是傷長,一般人一工上班八、九點鐘，醫護人員定定唯早起無閒到暗時,外科醫師看門診、開刀擱巡病房,莫怪會有過勞的情形。有時陣嘛真同情醫生,逐工看著的攏是這酸遐疼、面憂面結的病人,甚至愛對家屬宣佈歹消息,看病人無元氣,擱會講安慰的話,抑是弄予病人笑,算起來嘛真可取。

有一工嘴齒岸咧疼,去牙醫診所,一入門著聽著美空雲雀的日本歌,崁過外口來來去去的車聲,二十三年次的老醫生看診竟然毋免掛老花眼目鏡,伊講是體質遺傳的關係,九十九歲的老父才騎電動車出去,嘛是抑會看報紙,真好命!

診療結束了後,醫生送我一條齒膏,擱用嘴齒的模型教我安怎洗嘴:唯根部洗對齒面,斡角的所在愛踅圓箍仔,一工三頓了後參睏前,攏總愛洗四擺,尾手擱交代:半冬後擱再來巡,毋通等到疼才欲揣醫生。