生日∙喪事

有一個退休的校長,因為社團的因緣,十外冬來定定通電話,嘛會提供寶貴的意見予我參考,有一工伊佇美國的囝仔L轉來,邀請過去做伙開講,可能是同鄉、小漢擱讀同一間學校,逐家真有話講,後來定定通電子批,嘛會敲電話。有一工L敲電話轉去,怹爸爸心情真稗,拜託我過去看覓,順紲送生日禮物,因為有糖尿病,袂當食雞卵糕,嘛袂當啉紅酒,所以禮物有較歹揀。

厝內辦喪事彼冬,校長交代:照風俗袂當買粽,擱央人送粽來。有一段時間,電話一直敲袂通,三個月了後怹兜的人共我講已經往生,寫一張電子批共L會失禮,無就近好好關心長輩,辜負伊當時的託付,想袂到一直無收著回批。

隔轉冬收著一封主旨birthday calendar的電子批,L想欲知影我當時生日,伊無定感覺欠我一個生日禮物。有一點仔倔強,回應講:逐工有人過生日,逐工嘛會使真快樂,Thanks anyway !十外冬的交情,辦後事煞予人當作無相關的人,感覺無啥好,對美國式的人際關係嘛無啥理解。

舊年L轉來台灣,敲電話講祖厝想欲出租,叫我鬥揣看敢有適當的人選,有問過一個銀行員,毋過伊拄好欲換頭路,所以無回報消息,留台這段時間嘛無見著面,淡薄仔毋過心,聖誕節傳趣味的音樂動畫,祝福聖誕節快樂,L嘛有一點仔倔強,回應講:Happy ereryday!