認人

有一工去嘉義開會,時間抑早著順路去揣蕭教授,伊拄好共人約欲見面,招我做伙過去沈教授怹兜,才坐落去,沈夫人講:「咱捌見過面!」,緊張一下愈想袂出來,伊講某一暝佇新港奉天宮口的演講會,記智真正毋是普通的好!沈教授講台大合唱團每一個人的名,甚至怹的家人,夫人攏會記哩,實在是真罕見的特殊才能。

某電台的DJ,講一個女性立委有一工去電台接受訪問,隔轉工佇車頭相拄,想講立委一定袂認哩伊,想袂到立委先叫出伊的名,共伊相借問,參一般的公眾人物真無同。

小漢因為厝內做生理的關係,看著人攏會先問人,較大漢了後,歹勢共人叫,無遐好頭嘴,嘛會先頕頭,有一工轉去外媽怹兜,看著阿財oj i桑(さん)徛佇窗仔邊,共頕頭伊攏無反應,問表姊怹講:「阿財oj i桑這幾冬是毋是身體抑是心情無好?」怹共我倒問:「安怎講?」我講:「最近共頕頭,伊攏無表情」逐家聽了攏笑出來,原來oj i桑目睭已經失明幾偌冬。

毋知唯啥物時陣開始,感覺目睭四界巡是一種攀緣,所以真少看人的面貌,出門的時陣唯這位趕到彼位,騎車、駛車甚至路裡的人,攏若像無面同款,有時陣佇郵局抑是超市,會想袂出對我笑的是啥物人,只好趕緊頕頭相借問,毋過有的人會因為我無先共問,真無歡喜,另工相拄我共問,怹煞假做無相捌。

有一工嚨喉疼欲去病院,到文科路看著路邊一個婦女搬一箱物件,停車問伊敢欲搭便車,才認著伊拄好是病院的掛號小姐,伊講:「毋免,欲到矣」共講:「拄好欲去恁病院」,原來彼日有醫生請逐家啉咖啡,袂記哩騎車出來,才會搬二十四杯咖啡佇路裡行,入去病院透過小姐紹介,逐家攏對我露出親切的笑容。