字體:小 中 大 | |
|
|
2014/08/11 22:18:22瀏覽653|回應1|推薦63 | |
古井 小漢的時陣,門仔(註1)入去倒爿(註2)有一口四角形的古井,四爿邊仔鞏紅毛土(註3),阿兄怹佇內面飼兩隻龜,一隻大隻,一隻小隻,若想欲佮龜耍,著用桶仔上(註4)起來,掠去對面郵局的後庭,彼陣郵局的後壁門攏到晚時下班才會關,尾手龜毋知安怎死去,嘛埋咧郵局後庭,奇怪的是郵局欲起大樓的時陣,安怎挖攏揣無龜殼。 家族的人會唯古井上水來沃花(註5)、沃榕仔,有一個嬸婆擱會佇古井腳洗物件,聽嬸婆講:抑無水道水(註6)以前,日時門仔攏無關,予厝邊腳尾來這擔水轉去用。 有一暝,我參阿兄佇二樓,雄雄聽著「pon…」一聲,七叔公的聲音講:「欲安怎?」爸爸講:「落去捎(註7)」,又擱聽著「pon…」一聲,爸爸真正跳落去古井共這個嬸婆的後生救起來。 尾手古井填起來,門仔嘛早早著關門,一段家族甚至厝邊密切來去(註8)的日子嘛漸漸愈離愈遠,即馬真濟族親遷徙到別位,欲見面只有等到清明家族培墓彼一工。 註1:小門、後門或側門。 註2:左邊。 註3:以水泥砌成。 註4:以繩子綁在桶子上,投入井中取水。上,音tshiūnn,第3聲。 註5:澆花。 註6:自來水。 註7:用力取物。捎,音sa,第1聲。 註8:來往、互動。 |
|
( 創作|散文 ) |