台語文e日子

八月十一日，禮拜六，這一工對台文界算是一個值得紀念e日子，因為文化古都台南市為府城出身e台灣作家葉石濤設立「葉石濤文學紀念館」。葉石濤，1925年十一月初一佇府城出世，2008年十二月十一日佇高雄過身，迒(註1)過日治參戰後兩個世代，小漢讀過漢文，台南州立第二中學校（即馬e台南一中）畢業，日治時期做過《文藝台灣》雜誌(作家西川滿主持) e編輯，戰後做國校老師，逐家較知影e作品是小說《台灣男子簡阿淘》。1950年葉石濤發表規偌篇世界文學e評論，1951年因為「知匪不報」被判刑5年，坐監3年，出獄了後失去教職，為著生活四界去國小代課，中年入去台南師專進修，頭尾教冊(註2)將近五十冬。1965年佇《文星》雜誌發表〈台灣的鄉土文學〉，開始寫作家、作品評論，1987年完成《台灣文學史綱》，是第一部(註3)台灣人家己寫e台灣文學史，嘛是台文系所必讀用冊，對台文界有真重大e意義。2008年出版《葉石濤全集》，內容有小說、評論、翻譯，攏總二十三大冊。仝期台灣文學界三大巨人：南部葉石濤(1925-2008)、中部陳千武(1922-2012)，即馬賰北部鍾肇政(1925-)，向望怹袂感覺傷(註4)稀微(註5)。

八月十一日，另外一件代誌是雲林縣台語文學會成立十周年紀念大會，2002年開始去社區大學學台語文，聽著創會會長蘇校長演講，真受感動，2005年開始佇學報投稿，有問題嘛定定請教這些先進，逐家攏真熱心、無囥步(註6)，2006年佇電台開一個台語之美e文化性節目，2009年義務提供雲林故事館《故鄉的滋味》CD歌詞。十冬來，學會栽培真濟國小台語文老師，有學員出專集、出畫本，真濟學員得到文學獎，有人提到博士、碩士學位，有人專門教台語研讀佛經，有人辦囝仔營、文化節、藝文導覽、生態志工等等，予台語文徹底生活化。大會彼工真濟先進上台演說、朗讀作品，囝仔朋友e表演特別影目(註7)，看台語文學會開枝散葉，上歡喜e著是創會蘇校長，祝福伊康健食百二，引chua逐家繼續佇這條路行落去。

註1︰跨越，音hann第7聲

註2︰教書

註3︰套裝書的單位，音pho第7聲

註4︰太過

註5︰蒼涼、孤寂

註6︰藏私

註7︰引人注目