鄉土之美

四月初七台文所邀請廈門大學台灣研究院台灣文學所所長徐學教授，來國際會議廳演講，題目是「台灣文學中e鄉土之美」。徐學教授，中國安徽省合肥人，著作有:《台灣當代散文綜論》、《廈門新文學》、《八十年代的台灣》等冊。

演講中間徐教授舉詩人余光中佮散文家王鼎鈞e作品，余光中e「鄉愁四韻」佇民歌時代確實真受少年人歡迎，毋過解嚴了後e台灣早著無遺民想像，長江水、海棠紅、雪花白佮臘梅香這款意象，對台灣人來講遙遠又擱生份，若講鄉愁無定「黃昏e故鄉」、「阮若打開心內e門窗」，甚至「福爾摩莎頌-抱著咱e夢」這幾首歌參台灣e土地才有法度聯結；另外王鼎鈞e散文「那樹」，其中有一句話：「故鄉是祖先流浪e最後一站」，多年了後也是真值得思考，可惜e是王鼎鈞居留美國三十冬，無轉去最初e原鄉，嘛無回到祖先選定e故鄉。

廈門大學三十二冬前著成立台灣文學所，官方對台文e研究比台灣起步擱較早，而且徐教授幾偌遍(註1)到東海大學、屏科大、成大、台藝大、中山等校演講，甚至腳跡踏遍台灣偏遠山區、魚村，累積在台時間有兩冬以上，莫怪對台灣民間旺盛e生命活力會有深刻e體會，尤其對保留傳統e正體字有真高e評價，生活佇自由、多元社會e咱逐家(註2)，嘛應該好好寶惜、發揚精緻e台灣文學。

註1:好幾次。

註2:大家。