期待第三次鄉土文學論戰

一九三0年代第一次鄉土文學論戰,台灣作家是毋是應該用台灣語文創作?引起雙方爭論不止,台灣新文學之父賴和因為這場論戰,開始改用台語文寫作,可惜因為戰爭的因素,日本政府採取皇民化政策,第一次鄉土文學論戰只好收兵。

一九七0年代有關台灣文學的寫作方向佮路線,引起第二波擱較大規模、擱較激烈的論戰,其中代表台灣意識的葉石濤晚年嘛真遺憾,無法度以母語寫作,干但會曉寫日語、華語,這場論戰最後嘛是無達到預期的效果,但是八0年代以後自由、多元的台灣文學,中間出現了母語文學,李勤岸、向陽、黃勁連、宋澤萊、陳明仁、林央敏…等人以台語文寫作,杜潘芳格、黃恆秋運用客語創作,原住民作家甚至以原住民語寫作,會使講是鄉土派的延伸,而且民間研究母語的社團、刊物愈來愈濟,學校設台文系所嘛有相當的成果。

歸類作鄉土作家的黃春明先生五月廿四日早起佇台灣文學館演講，題目是「台語文書寫與教育的商榷」，內容以「閩南語」、「方言」來稱呼台語,甚至點名批判台語文前輩鄭良偉教授佮洪惟仁教授，而且批評台語文書寫是「不倫不類」。成大台文系副教授蔣為文認為黃春明並毋是台語文專家，題目挑戰的意味十足，提著以華文、台羅拼音「台灣作家不用台灣語文、卻用中國語創作，可恥」、「Tâi-oân chok-ka ài iōng Tâi-oân-gí chhòng-chok!」、「用殖民者的語言華語創作才須商榷！」的大字報,在演講會恬恬抗議,引起黃極度不滿,雙方發生衝突。

諾貝爾文學獎得主(一九二三年)愛爾蘭詩人兼劇作家葉慈，早年的詩作攏是唯愛爾蘭神話佮民間傳說來取材,葉慈嘛是愛爾蘭凱爾特復興（Celtic Revival）運動的領袖,雖然無法度用凱爾特語創作,但是伊捌安爾講:「唯奧里亞雷的談話佮伊借我抑是送我的愛爾蘭書冊當中，成就了我一生的志業。」