親情的甘、親情的苦

萬籟俱緣生，窅然喧中寂；

心境本同如，鳥飛無遺跡。

------唐‧柳中元

    未當否認親情的深、親情的厚，親情的甘、親情的苦。愛去了解的是..親情是一種緣份，真深的緣份，愛好禮仔珍惜、照顧、付出。咱咧苦勸人愛看開，是勸人毋通拄著親人分散的時、感情產生變化的時，生起煩惱、艱苦，致使原本平順的生活、平順的心情受著打擊，未歡喜、未平安。

    任何物件、代誌攏是因緣生、因緣滅，親情嘛是。親情，有時合、有時分，因緣和合相總是未久長，這是事實，這是真相。認清緣起緣滅的真相，總是會分開，會分離，無可能有永遠未改變的，這是無奈，這真理，這是自然。世事本無常，咱愛清楚，咱愛瞭解，毋管親情有任何變化，亦是愛一切隨緣，甘願受，才會自在。了解有做伙，必然會分散

，叫做看予開。 

    查某囝嫁出..毋甘，囡仔去外位讀冊..毋甘，好像是我的囡、我的囝失去我的身邊，其實是彼個我咧作怪，彼個我咧毋甘，彼個我貪愛咧艱苦，是彼個我失去掌握咧不安、咧受氣，是彼個我咧起無明。 

    現主時，咱猶原盡力做咱的本份，共款照常去疼伊，毋拘愛知影即個道理。毋是傷心才是表示咱疼伊、咱有愛伊。捨去彼份「我的」，放下彼份「我的」，認真過咱的生活，毋通予親情的大索綑縛，留戀不捨。假使生活的規律方向混亂，心情苦甲化未開，憂鬱上身，就走火入魔。（2007.09.16.）