目連救母-盂蘭盆節的由來 

佛弟子目犍連精進修行有了成就，得著六大神通，佗六種？天眼通、天耳通、他心通、宿命通、神足通、漏盡通，咱所講的神通廣大就是具備了這六種神通。一般鬼神濟少嘛有寡神通，才會變鬼變怪仔作弄，無按呢安怎有人欲拜。鬼神有五通，除了無漏盡通。漏盡通是啥？簡單講是煩惱斷盡，得解脫無閣輪迴。 

目犍連，就是世間人傳說中目連救母的目連，伊修行初步成就，第一層就想著欲報答父母晟養大恩。伊用道眼觀視三界，看著老母墜入餓鬼道中，飫饑失頓，無一屑仔水通啉，無一屑仔物件通食，瘦甲皮連骨。目連足艱苦心，隨用缽貯飯，展神通送到老母面前，老母提著缽飯，用左手遮崁缽頂，一面用正手提起食物，吞猶未落喉，就化成火炭，食無。 

目連大驚慘叫，放聲大哭，隨飛轉來稟報佛陀這般這般。佛講：「你母親罪根深重，毋是你一人的力量會當改變，你雖然有孝，驚動天庭地府、邪魔外道道士、四大天王，連怹欲幫贊嘛無可奈何。愛靠十方眾僧威神之力，才有法度得著解脫。今日我特別講出救度的方法，予一切眾生，攏會當靠著即個方法脫離悲憂苦惱。」 

佛共目連講：「十方濟濟的出家眾，七月十五即工，就是『僧自恣日』，來為咱的七世父母，佮現在的父母，生的也好過身的也好，如果拄著災厄或者苦難，備辦飯食參上高貴、上稀罕，濟濟種類的好食物、五果等等，用洗盪清氣的盆仔貯予好，來供養十方僧眾。即個時陣，一切聖眾蹛佇山裡禪定也好，或是得著四阿羅漢果也好，或是佇樹跤經行也好，或是六通自在、十地菩薩的大人，示現做比丘相，佇大眾中，攏共一心受盂蘭盆供，先為施主咒願，了後才食。遮攏是持著清淨的戒律，三業清淨，德行親像海水廣大無邊。 

若是供養遮的精進用功或者是會曉反省無夠精進的出家眾者，現世父母六親眷屬，攏會當脫離三塗之苦，得著解脫，自然有通穿有通食。若是父母健在者，福樂百年；若七世父母也會當超生天上，化生到妙華光明之中，享受著天福的快樂。佛陀教導十方眾僧先為施主家咒願，願怹七世父母，以禪定行三昧加持力，使受食者無始以來障礙，一切皆除，然後才會當受食。 

彼個時陣目連參眾大菩薩，攏非常歡喜。目連停止了悲傷，隨去備辦如法供養，目連的老母彼一工就脫免了一劫餓鬼之苦。目連閣向佛陀稟報：「弟子的老母，仰蒙三寶功德之力佮眾僧威神之力得著超拔。若未來世的佛弟子，若來依教奉行盂蘭盆供養，會當像按呢救度現在父母，乃至七世父母無？」 

佛講：「我拄欲講，你煞先問。一切佛弟子攏會當佇七月半佛歡喜日，就是僧自恣日即工，用百味飯食，安盂蘭盆中，施十方自恣僧，來報答父母長養慈愛之恩，。若是會當按呢供養，父母攏會得著大利益，逐家攏會當按呢來供養。」

彼時目連比丘、四眾輩弟子攏真歡喜，依教奉行。