字體:小 中 大 | |
|
|
2008/12/30 18:39:09瀏覽3374|回應0|推薦4 | |
笑話‧媒人婆仔 早前有一個媒人婆仔足爻做媒人,牽成足濟對姻緣,人人真呵咾,媒人婆仔足顧謙,講奚是「姻緣到,毋是媒人爻。」 有一擺伊閣紹介一對郎才女貌的緣投囡仔佮嫷姑娘仔熟似,尾後雙方看了有意愛,講話閣會投機,就揀一工好日欲矺訂掛手指。 訂親彼工,男女雙方的親情朋友攏來觀禮,廳頭是歡頭喜面,鬧熱滾滾,新娘仔就捧茶出來請人客,媒人婆仔出聲講:「新娘捧茶對面來,囝仔大細鬧猜猜;列位親友坐予在,敬老尊賢則應該。」啥知影新娘毋知傷緊張亦是按怎,拄捧茶予新郎的時,新娘仔煞連紲放兩個屁,普!普!閣未細聲,一時間逐家煞毋知欲按怎,新娘是歹勢甲面仔紅記記頭仔犁犁犁,規客廳所有的目睭共時間攏相對媒人婆,看媒人婆欲按怎,媒人婆有影足機竅,無驚無惶,順喙就講:「啊!真好,一屁、二屁,雙雙對對!」眾人聽了感覺真心適,笑哈哈,噗仔一直扑。 新娘入去歇一下仔,就閣出來收茶甌,媒人婆就講:「新娘茶甌緊來收,新郎新娘真溫柔;紅包予恁添福壽,兩姓合婚配千秋。」新娘閣行到新郎遐,煞閣普!普!放二聲響屁,鬧熱的場面隨恬寂寂,逐家的目睭像款斡對媒人遐,媒人婆足鎮靜,開喙就講:「啊!真好,三屁、四屁,萬年富貴!」哇仔!噗仔聲閣響起來,眾人聽了感覺真鬥搭閣趣味,稱讚媒人婆爻講話喙舌轉蓮花。 欲掛手指的時,媒人婆就走入去內底悄細聲共新娘仔交代,愛小忍咧毋通閣放屁啊!新娘出大廳,椅仔坐正正,媒人婆就講:「手指掛予正,翁仔某得人疼。一銀佮一金,二人共一心。翁某若共心,烏土變成金!」逐家扑噗仔,扑甲足大聲。誠實的,新娘有撙節,佳哉無閣放屁,媒人婆仔笑嘻嘻。 過訂完滿,男方欲告辭,女方出來送人客,俗語講「有一就有二,有二著有三,無三不成禮」,新郎拄欲行出廳,新娘仔忽然間煞閣普!普!放二個屁,眾人亦是閣斡頭看媒人婆,看伊紲落去欲講啥好話。啥知媒人婆仔想一下久,著講:「啊!真好,五屁、六屁,喜酒我未啉(lim)就先醉,你若閣放屁,恁祖媽連鞭著漏氣!」 ○圖..埔里王灝老師畫作
|
|
( 創作|另類創作 ) |