字體:小 中 大 | |
|
|
2007/07/08 11:14:48瀏覽1300|回應4|推薦5 | |
澎湖遊記 話頭欲去澎湖進前有詳細查過網站紹介的資料,毋閣無特別的感受,去過,才知影確實是嫷,確實是瓚!台灣這塊土地確實有夠美麗,值著咱用心交陪。 風景區嫷痞歹比並,看遊客對景點有產生感動無,有感動才是好所在。台灣有山閣有海就佚陶未完,素來就毋捌有欲出國佚陶的念頭。
出航 出大海,海湧大,客船親像轎車行踮懸低無平的大路,膨一下蹋一下,若膨起來就出現人客「哇啊」的喝聲,慣習一睏仔就無人閣喝咻。煞換做有人咧「掠兔仔」,彼爿吐,這爿嘛有綴咧吐,前前後後有人吐,相紲咧吐,彼種咧吐的聲嗽實在是恐怖,真驚予穢著。我感覺有一點仔眩,趕緊抹白花油踮頭額佮鼻孔口,閣放輕鬆予睏去,想講若睏去就無代誌,閣想著早前坐花蓮輪眩佮吐艱苦的滋味,心內默念心經的咒心「揭啼揭啼,波羅揭啼,波羅僧揭啼,菩提梭哈」,佳哉有效,逗逗仔睏去,等聽著船長廣播到位,一精神,海水青蘢蘢,島嶼的身影明明明現在目睭前,有影是山明水秀的好所在。
媽祖宮出了港口,有導遊來接去坐遊覽車,車頂導遊做澎湖的紹介,真緊就到了第一站鼎鼎有名的天后宮媽祖廟,根據學者考證認為天后宮的前身「媽祖宮」至少佇一五九二年就存在,也就是廟史到今已有四百一十五年,是全台灣上古老的一座廟,名列國家一級古蹟。廟佇一九二三年的重建,一九八六年閣一擺整建了後,就是現此時的面貌。 雖然並無像台灣的大廟赫呢大間、氣派,毋過有了莊嚴樸素的氣質。舖石的廟埕一爿是民家商店,一爿是大欉榕仔,樹仔跤蔭影有椅仔夆歇困,才特別發覺澎真正是有夠熱。入廟的八卦形石崎聽學者講是獨一無二的,造形真嫷,毋旦是予朝拜的人好行踏,也有地理風水的考量,用意是「定八卦鎖地虎」,簡單講就是無愛予土跤下「無清氣」的鬼靈出來破壞或者騷擾這個神聖的所在,共怹用這個八卦攏鎮佇土跤兜未狡怪。」 頭前的三川殿經過風雨日曝年久月深,艷麗的色彩退色甲偆本色,雕樑的吊筒垂花已經變成木材的本色,倒爿的青龍佮正爿的白虎,壁堵退甲強欲像白紙。正面的門壁雕刻的吉祥圖案嘛退甲無半點色彩,「花瓶」代表著「平安」的意思,「夜婆(蝙蝠)」代表著「賜福」的意思,細膩共欣賞攏真典雅、幼秀,閣有歲月滄桑的感覺。 三川殿內面的拜亭樑架中間有真複雜的彩畫雕刻裝飾,也閣保留金漆的模樣,大部分有予香煙薰甲烏去,看起來變做烏金仔烏金,木雕的獅座活龍龍,木雕的花鳥攏蘊藏深深的含義,像牡丹白頭翁代表「富貴白頭」,鷺鷥蓮花顯示「一路連科」的意思。 正殿是媽祖佮千里眼、順風耳兩位護法神,殿內殿外的木雕石雕攏真嫷,真有藝術美感。後殿是兩層的樓閣,稱做清風閣。收藏現存台灣上蓋早的石碑-《沈有容諭退紅毛番韋麻郎碑》,閣有媽祖出巡的兩頂鑾駕坐轎,構造參人無仝,遮的媽祖出巡是坐船的。 其他的同事綴導遊去市街揣食,阮留廟裡用家己扎的食物,食完我一人四界踅,看廟邊的澎湖第一街,有施公祠、老街、摸乳巷咕咾石砌的古厝,未記去四眼井。尾仔佇樹仔跤飲在地特有的風茹茶,冰涼涼真退火,芳芳甘甜真好飲。....待續 救援...相片貼未出來..如何是好.. |
|
( 心情隨筆|雜記 ) |