毋甘你離鄉背井的身命

疼你搰力爻煮食

了解你是人的阿娘定想囝

你破病、載你去看醫生解病疼

你齒疼、三工兩工載你齒科掠齒蟲

你想改變頭鬃型、載你去頭鬃電予水噹噹

你會寒、陪你踅街買新衫

你寂寞、陪你開講談心情

你搭心的言語，講阮是你搪著上蓋有量的查仔人

相信你講的彼句話，真心付出無分懸低

掠準咱有緣、千里迢迢來熟悉

掠準阮並別人較好運

外傭的議論紛紛阮無份

在來阮騎機車，車聲你知影

未到厝、你就幫阮開門提物件

這一工，騎電動車仔出外

入門時無聲

煞看你面仔青恂恂

唯本成落鎖的阮房間走出來

心足疼、心足疼

：「你欠啥？」無問出嘴的這句話

心肝底滾絞…佇深夜～我心誠疼～