*(演講稿)

逐日好心情，學習才會成。          

各位評判老師、各位同學，逐家好！  (行禮) 

我是第○號，今仔日欲演講的題目是：逐日好心情，學習才會成。

         人活佇世間，每一工無論是悲傷抑(ia̍h)是快樂，攏應該歡歡喜喜來面對，因為咱人面若有笑容，逐日保持好心情，對家己的身體健康有真大的影響，啊對讀冊學習方面嘛有誠(tsiânn)大的幫助。

         咱定定會感覺著親像有啥物件佇心頭咧鼓勵著家己，斟酌共想來，才發現這無形(bû-hîng)的物件原來就是心情，人有好心情的時陣，看天天也藍(nâ)，看雲雲也白；看海海也青，看花花也紅，人生是充滿色彩。啊若無心情的時，侵入咱身心的是憂愁、煩惱、鬱卒、悲傷佮寂寞(tsi̍k-bo̍k)，這款的人生就是烏白的。   

         予家己一个好心情，讀冊學習才有好成果。啊是欲按怎予家己逐日攏有好心情咧？鋩角(mê-kak)就是你有願意去培養、調和(tiâu-hô)--無？佇安靜的暗暝，有人鼻未著荷花(hô-hue)送來的清芳(phang)，你卻會當佇輕柔的微風中聽著荷葉仔戲弄田嬰佮伊綿綿(mî)的情話；北風吹kah  hū-hū叫，有人無將寒梅(hân-muî)開花看在眼內，你卻會當佇落雪(lo̍h-seh)的時陣欣賞梅花冰清高節(tsiat)的喜悅(ua̍t)。 

         逐日保持好心情！予咱共不安的心境(kíng)，佇悠揚(iu-iông)的音樂中放(pàng)輕鬆，牽引(khan-ín)咱行向大自然，你會感受著流(liû)轉的旋律(suân-lu̍t)，已經洗清你心靈的憂愁， 調和(tiâu-hô)四序(sù-sī)的心情，激勵(kik-lē)著你的性命koh較有活力(ua̍h-li̍k)。

         若培養好心情來鼓勵學習，毋管是學啥物攏同(kâng)款會有成果，俗語講：「做人著認真，做事著頂真。」我是一位學生，課業的壓力誠重，欲學的智識猶足濟的，除了愛注意身體的健康以外，上重要的就是逐日愛保持有好的心情，佇學校讀冊學習才會精進，我會好好仔拍拼，骨力學習，向望將來有出脫，會當造福服務社會，做一个有路用的人。

        我的演講就講到這結束，多謝逐家！

                  minda 2014.11.7