*(演講稿)

我上敬重的人 

各位評判老師、各位同學，逐家好！  (行禮) 

我是第○號，今仔日欲演講的題目是：我上敬重的人。 

         人的一生中，佇每一个崁站攏有內心敬重的人，親像講辛苦晟養咱的爸母，拍拼教咱讀冊的老師.....，攏是使人敬重的人，啊我上敬重的人是阮阿媽。    

        逐工透早，雞猶(iáu)未啼，狗嘛猶未吠，厝內的亂鐘仔(luān-tsing-á)就會霆(tân) kah喨喨(liang)叫！有時陣我嘛會雄雄驚醒煞(suah)睏未去，就起來去灶跤啉寡滾水，讀幾頁仔冊，ôo！看著客廳好親像有一个人影佇遐(hia)，目睭擘(peh)金斟酌共(kā)相(siòng)，原來是阮阿媽，伊拄(tú)咧幌(hàinn)手、踏跤，七早八早就起來咧做運動矣(ah)！

        阮阿媽今年已經七十八歲矣，毋過身體猶是誠(tsiânn)勇健，外表看起來比同(tâng)年的老大人加足少年的，人攏呵咾伊是「媠(suí)阿媽」，因為阮阿媽平常時攏有咧保養，伊定定講身體若勇健，無啥病疼(thiànn)，家己會行koh會走，自由自在，免勞煩序細。嘛因為按呢，伊的生活過得真快樂，佮厝邊仔誠好鬥陣，事事項項攏會替人設想。   

        阿媽知影我當(tang)咧轉骨較gâu食，若放學轉到厝裡，攏會枵(iau) kah大腸告小腸，伊會攢(tshuân )一寡點心，親像煮紅豆芋圓、煎菜頭粿、炊包仔、......，哈！我講kah喙瀾(nuā)強欲流落來，這阿媽牌的點心，外口是有錢嘛無地買ôo！我有這爾(tsiah-nī )貼心的阿媽，真正是點燈仔火嘛無當(tàng )揣(tshuē )。

        阮阿媽真勤儉，定定共阮這序細(sī-sè)教示講：「人愛勤儉才有底。」koh講咱庄跤人無啥物手藝，愛感謝天公伯仔對咱的照顧，予咱有一塊仔田地通(thang)好種作，古早人講「百般手藝，毋值得鋤頭落地。」這世人攏靠這塊田地飼咱一口灶，講阿爸、阿叔、阿姑的教育佮才情，嘛是全靠跤底這塊土地的晟養佮栽培，雖然做穡(sit)人是看天咧食飯，種作真艱苦無快活(khuìnn-ua̍h )，毋過咱愛知足、感恩，俗語講：「做雞著筅，做人著反。」koh講：「一枝草，一點露。」只要咱肯拍拼骨力作穡，天公伯仔一定會疼艱苦人。

        阮阿媽嘛定定勸人講：「咱做人愛寶惜衫仔褲佮惜食，毋若愛惜財koh愛惜福。啊若求名求利、不如求家己，較贏咧求別人。」我感覺阮阿媽講這的話足有智慧的，所以我心內對阮阿媽是koh較敬重，逐家若聽有入耳(ji̍p-ní)，會曉抾(khioh)起來勉勵家己，佇日常生活中好好仔來做，佮人徛(khiā)佇社會拍拼，一定會出頭天！

        我的演講就講到這結束，多謝逐家！
minda  2014.11.6

註：

亂鐘仔(luān-tsing-á)：鬧鐘。