* (演講稿)

我佮大自然有約會                              

各位評判老師，各位同學，逐家好！我是第○號，今也日欲演講的題目是「我佮大自然有約會」。

        我是佇(ti7)都市大漢的飼料雞仔，每一工看著的攏是懸懸懸(kuan5)的樓仔厝佮汽車、oo1-toh4-bai2，真少有機會去野外。阿母驚我變成軟跤(ka1)蝦，對(ui3)前年(tsun5--ni5)開始，每一个(e5)拜六、禮拜，阿母攏tshua7我去peh4山。佇咧(leh4)台中，上有名閣(koh4)上方便的所在就是－大坑(khenn1/khinn1)。

        大坑總共(kiong7)有10條peh4山的路線，阮(guan2)對上簡單的10號開始peh4，攏總要(ai3) peh4  1024層(tsan3)的樓梯，到山頂有一座觀音亭，遐(hia1/hia5)有義工teh4煮早點，足濟(tse7)人咧排隊，三四排躼躼長(lo3-lo3-tng5)，早點有炒麵、圓仔湯、鹹糜(be5/mue5)、麵湯，看起來是真好食(tsiah8)，干焦(kan1-na7)鼻著芳味我的喙瀾(nua7)就(to7)流未煞，毋過(m7-koh4)，阿母攏講人傷(siunn1)濟，毋准我排隊，我只好閣共(ka7)喙瀾吞落去。

 閣來，是對9號的路線落(loh8)山，沿路看著足濟果子園，有荔枝、龍眼佮柚仔，三、四月柚仔花若(na7)開的時，規路是芳貢貢，欶(suh4)一嘴，目睭(bak8-tsiu1)就金起來loh4！，路邊猶(iau2 / ia2)有誠(tsiann5)濟攤仔，賣青菜、賣果子、賣點心、賣涼水，鬧熱滾滾，若菜市場同款，真趣味。

　　經過一站(tsam7)仔訓練以後，阮(guan2/gun2)就開始peh4較(khah4)困難的1號到4號的路線，這4條路線攏要盤索仔(puann5-soh4-a2)，拄(tu2)開始是peh4 kah4拍拍(phah4-phah4)喘，規身軀汗流谵(tam5)滴，跤痠手軟，強欲peh4未起去。毋過peh4過(kue3 / ke3)幾擺(pai2)以後就足輕鬆的，走若飛咧！這馬阮(guan2)攏是這4條路線輪流peh4，其中我上合意2號的路線，風景真媠(sui2)，沿路樹仔誠濟，有規年迵(thang3)天攏青蘢蘢(ling1-ling1)的五葉松(siong5)，五月開花若落雪的油桐花，倚(ua2)年兜(tau1)的時就會使(e7-sai2)欣賞上媠的櫻花，猶閣有真濟毋知名的野花。也(ia7 / a7)會當(e7-tang3)聽著鳥仔咧唱歌，看著杜定(too7-ting7)、蝶仔(iah8-a2)、蚼蟻(kau2-hia7)，各種小動物四界(ke3)飛、四界走，親像歡迎我來到大自然，有當時仔會看著猴猻仔(kau5-san1-a2)走出來散步oo5！

　　雖然風景遮爾(tsiah4-ni7)媠，毋過上重要的是2號路線的頂面有一个阿伯點心站，每擺我上期待的是peh4到山頂以後會當坐落來，啉(lin1)一杯仙草蜜，食一碗蚵仔麵線，或(ah8 / iah8)是一盤豆干，共頭前peh4山的疲勞佮辛苦完全攏放未記的，馬上閣金光冲冲(tshiang5- tshiang5)滾，瑞氣千條，閣有體力會當落山矣！

　　每个禮拜，從拜一到拜五我攏真認真佇學校上課讀冊，上期待的就是拜六佮禮拜會當去peh4山，透早就起床出門到大坑，共一禮拜的疲勞攏放予(hoo7)未記的！聽著鳥仔聲，跤步就足輕鬆；看著滿山青青青的樹仔，目睭金閃閃(sih4)，在大自然中有新鮮的空氣，予我感覺真健康。所以禮拜時毋通(m7-thang1)約我去tshit4-迌(tho5)或是看電影，因為我佮大自然有約會，我欲來去peh4山！

         我今也演講就講到這，多謝各位！     

                                                                                       minda 2010.9.8  

註：

1、peh4  山：爬山。   * (peh4  需造字)                                                           

2、盤索仔(puann5-soh4-a2) 或 扭索仔( giu2-soh4-a2)。

3、本文的"台羅拼音"用數字標出聲調。