 
字體：小 中 大 |
|
|
|
| 2018/06/20 17:09:08瀏覽1773｜回應0｜推薦52 | |
*(演講稿)
歕雞胿佮講白賊的秀才
各位評判老師、各位同學，逐家好！ (行禮)
我是第○號，今仔日欲演講的題目是：歕雞胿佮講白賊的秀才。
古早，有一个愛歕雞胿koh講白賊的人，少年的時陣四界去歕雞胿koh講白賊，毋若無予人掠起來koh趁(thàn)真濟錢，煞變成名聲透京城的財主。到老以後，身體無好，干焦(kan-na)會當跔(ku)佇厝內，除了大某、細姨、奴才，就無啥物人會當陪伊歕雞胿講白賊矣！
有一工，伊想著一个解心悶(būn)的妙(miāu)計，伊命令厝內的奴才佇庄頭四箍(khoo)圍的村鎮貼公告：「徵求講白賊，啥人若會當連紲(suà)講出三件白賊的事志，賞銀三百兩koh送一位媠查某𡢃(kán)仔。」
公告貼出無偌久，足濟人趕來財主的厝，in佇財主面前編足濟白賊話，財主聽了後，心情愈來愈䆀(bái)，甚至共人趕出門。這是啥原因咧？講是嫌人白賊話講得足無水準的！
有一工，一个少年的秀才遊學到這，聽講這件事志，伊真有興趣，嘛來到財主的厝裡試運氣。伊足有禮貌對財主講：「老爺(lāu-iâ)，我今仔日是來講白賊話予你聽的。」
財主共(kā)秀才講：「真好！你就講矣(ah)！如果你未當予我心情激動，我是會叫奴才共你趕出門。」
秀才應講伊知影，就開喙對財主講：「老爺，你看！我是偌爾仔(luā-nī-á)好額(gia̍h)啊！」
財主心內想講：「你這个小囝(sió-kiánn)，瘦kah像一隻猴，規身的衫仔褲是破破爛爛，明明是一个散鬼，猶佇這咧歕雞胿，我才未予你騙去。」所以，伊就順著秀才的話講：「是矣！你真好額。」
秀才紲(suà)落講：「老爺，你敢知影為啥物我會這好額？我共你講一个飼牛的好撇步。」
財主問講：「是啥物好撇步啊？」
秀才講：「我釘足濟大柴(tshâ)箱，每跤(ka)柴箱拄好貯(té)一隻牛，我共牛關佇柴箱內，佇柴箱的前後佮兩爿(pîng)邊仔挖(óo / ué)四个孔(khang)，我對(uì)柴箱頭前的孔飼牛，用柴箱後的孔予牛放屎尿，對柴箱倒爿的孔抽牛油，啊對柴箱正爿的孔割牛肉。哈！我遐(hia)可愛的牛，油愈抽是愈濟，肉愈割是生著愈緊，我就是靠這的牛才趁著真濟的錢。
財主忍未牢(tiâu)大聲喝(huah)講：「哪(ná)有這款事誌？無可能，你咧歕雞胿！」
秀才一聽真歡喜，就緊講：「老爺，你激動矣！」
財主才想講這小囝果然有二步七仔(jī-pōo-tshit-á)。
秀才紲落講：「我細漢的時陣，讀冊攏考第一名，這點你早就知影矣！」
財主緊發揮家己歕雞胿的本事，應講：「是！是！是！我知影，你真的攏考第一名。」
秀才著koh講：「彼當(tang)時，你定定摸我的頭殼，共我呵咾講你真巧(khiáu)，等你大漢，我就共三姑娘嫁予你做某。」這馬我已經大漢矣！請緊共你的三姑娘嫁予我。
財主一聽真著急(tio̍h-kip)，大聲辯講：「烏白講！我啥物時陣答應欲共三姑娘嫁予你？」
秀才聽了後，微微仔笑講：「老爺，你莫(mài)激動啊！」.
財主驚kah大嘴開開，暗暗仔叫苦：「這小囝道行真深啊！」
秀才koh講：「幾冬前，我是一個生理人，四界賣物件，有一擺我載一車滿滿的梨仔，來恁厝門口賣，彼當時天氣足熱，梨仔真好價，一籠(láng)梨仔賣一百兩銀，我會記得(tit)你共我買三籠，猶未付錢咧！」
這聲財主愣(gāng)佇遐，喝講：「臭小囝！你是搶錢啊？有氣魄，比我較雄！」
最後，財主毋但(m̄-nā)真的共三姑娘嫁予秀才，koh共家產攏傳予秀才，秀才嘛無辜負(koo-hū)老財主的心意，將歕雞胿佮講白賊的本事攏發揮出來，共伊的家業愈做愈大愈興旺。
我的演講就講到這結束，多謝逐家！
minda 2014.11.9 / 修於2018.6.20
*附註：
1、歕雞胿(pûn-ke/kue-kui)：吹牛、說大話。說話浮誇不實。
2、koh(復、閣)：又、再、還。
3、趁(thàn)：賺取。
4、干焦(kan-na)：只有、僅僅。
5、跔(ku)：將就待著、窩著。
6、紲(suà)：接、續。
7、媠(suí)：漂亮的、美麗的。
8、𡢃(kán)：婢女。
9 、in：他們。
10、䆀(bái)：惡劣、糟糕、不好。
11、偌爾(luā/guā-nī)：多麼。
12、好額(gia̍h)：富裕、富有。
13、kah(甲)：到。(到……的地步。表示所達到的結果或程度。)
14、散鬼：窮鬼、窮光蛋。很窮的人。
15、跤(ka)：只。計算戒指、皮箱等物的單位。
16、拄好(tú-hó)：剛好、恰巧。
17、貯(té/tué)：裝、盛。
18、爿(pîng)：邊、旁。
19、遐(hia)：那、那些。
20、二步七仔(jī-pōo-tshit-á)：本事、本領。
21、恁(lín)：你們。
22、毋但(m̄-nā/niā)：不只、不但。
|
|
| ( 創作｜詩詞 ) |
