社區的花園

一个新起的社區，佇經過廿二冬以後已經變成老社區，當年搬來

蹛的住戶，嘛攏有歲矣，有的已經歸仙。

早年美化社區環境，逐口灶門口的花園花草旺盛，蜂蝶仔採蜜飛

來飛去，厝鳥仔群唱歌啁啁叫，囡仔規陣走相逐耍   kah 笑聲連連

，社區充滿快樂的活力，足鬧熱的，附近的幼稚園佮國校定定有

老師𤆬隊，帶著小朋友入來社區課外教學認捌花草植物。

早頭暗尾是住戶整理花園沃水和交流花經的時陣，逐家互相欣賞

家己照顧的花草，若有病蟲害就研究看按怎防治，嘛交流各種生

湠的好經驗。

歲月無情催人老，愛花的住戶攏有歲矣，有的身體欠安無力頭整

理花園，只好放咧發草自生自滅，歸仙去的有的子孫無興種花，

只好共盆花分予人疼，社區內的環境色水差誠濟。我愛花草，定

定利用散步運動的時陣，順手幫忙整理盆花薅草、沃水，也捌替

一位歸仙去的阿婆照顧   in 兜的花園四、五冬。

這馬阮嘛有歲矣！這世人無論偌爾仔愛花也是愛量早做準備，門

口的花園需要做改變，才有法度繼續照顧。

                                                                                      minda 2025.12.26

附註：

1、蹛(tuà)：居住。

2、𤆬(tshuā)：帶領、引導。

3、生湠(senn/sinn-thuànn)：生育繁殖。

4、薅草(khau-tsháu)：拔草。

5、沃水(ak-tsuí)：澆水。

6、偌爾仔(guā-nī--á)：多麼。