2022年尾聲

時間過得足緊，一冬閣欲過去矣！

回想這一冬來，猶是謹慎咧做好防疫，無隨便拋拋走，足感恩的，阮全家大細攏有平安。

誠向望疫情會當早一日過去，毋過，近日電視新聞咧報講閣一波的疫情來矣！期待2023年疫情消除，迎來祥和安定的日子，平安就是福。

2022年的春天，安安滿三歲，加足大漢款嘛加真巧，誠𠢕唱歌，話也講得滑溜，台語、華語攏會通，也會落幾句仔簡單的英語。安安真愛看冊，這馬有聲音的囡仔冊真時行，阿爸阿母足甘買的，安安有幾若本，定定愛共阮展寶。

佇八月，安安就去讀幼稚園矣，防疫期間送伊去讀冊，真使人bē安心，好佳哉佇兩歲時就開始養成出外掛喙罨的習慣，所以伊去讀冊攏掛會牢喙罨佮戴防護面罩，阮有共安安呵咾佮鼓勵。

幼稚園的老師有愛心𠢕照顧牽教，安安讀冊誠快樂，毋但提昇智識，也有交著好朋友，予阮心內誠歡喜。

                                                       minda 2022.12.31

附註：

1.𠢕(gâu)：能幹、有本事。擅長於做某事。

2.落(làu)：炫耀語言能力。

3.幾若(kuí-nā/lō/ā)：若干。

4.喙罨(tshuì-am)：口罩。

5.毋但(m̄-nā/niā)：不只、不但。

※   阮將近半年無po文章，感謝格友猶是攏有來行踏，共阮鼓勵，

多謝恁，勞力。