*(演講稿)

若準時間會當重來                       

      各位評判老師、各位同學，逐家好！  (行禮)  

我是第○號，今仔日欲演講的題目是：若準時間會當重來。

 　　咱人的一生，自細漢到老，毋管是啥物人，相信攏捌(pat4)想講「若準時間會當重來」，就欲共過去的某一个坎(kham2)站、某一項事誌，來做改變或是做予較圓滿的。

         可惜，時間親像流水，一去是無回頭，咱若lok8-lian1-liu2-lian1錯過以後就是過--去也，無法度koh來做任何的改變。有的人會痟(siau3)想講時間若會當重來，就欲重新利用彼段過去的日子，來完成一寡較有意義的事誌，毋過，一切攏傷慢也！攏未赴(hu3)也！毋管是遺憾的或是捌犯過的錯誤，若是對一個犯罪的人來講，無定著伊會選擇勤儉，拍拼做工課，毋是共寶貴的時間浪費佇精心計畫去做歹(phai2)，才來犯罪。

         曷(ah8)我是想講「若準時間會當重來」，我想欲共以前彼段學一大堆才藝，卻是十(sip8)藝九(kiu2)不精的時間，囥(khng3) 佇我上想欲學的棒球頂面。

 　   佇我讀國校仔的時陣，一年學拍桌球，二年到六年攏咧拍羽球，佇彼段其間koh拍高爾夫，甚至koh去學游泳。讀國一的時，盧彥勳拍入溫布頓網球賽四強，予我一時心肝齊(tsiau5)振(tin3)動，猶koh走去揣(tshue7)教練學拍網球leh4！雖然學著這爾(tsiah4-ni7)濟項的運動，毋過攏無學著我上合意的棒球。我每工功課若寫了，攏足愛看棒球的轉播，毋管是國內或是國外的比賽，就親像看著台灣之光王建民，就想著若有一工我會當徛(khia7)佇棒球界，頂港有名聲，下港上出名的聖殿－大聯盟，彼(he1)是有偌爾仔(lua7-ni2-a2)光榮的事誌也！

 　   自細漢時，我就予棒球深深吸引，毋過，無機會好好仔來學。這馬若拄著假日，有當時仔會佮同學耍(sng2)棒球，每一擺揮動球棒，用盡全身的氣力(khui3-lat8)打擊的時，我規身軀的細胞好親像佇一時間攏精神起來仝款！若是較好運一點仔，擊出著紅不讓，彼(he1)是會予人歡喜kah4 hi2-heh4叫。另外，投手也有投手的學問，會當投出變化多端的球，按怎三振對方，敢毋是足趣味的？每一个崗(kong1)位攏有無仝的工課，也攏有各自的學問，koh要隨時配合隊友逐家互相合作，未使(sai2)展悾(khong1)神搶出風頭，這種團隊的精神，koh較是棒球吸引我的所在也！

 　   我足佮意棒球的，毋過一般的學校因為場地有限，真少有棒球隊或是相關的社團，就按呢我的棒球夢就變成一个佇三天外的夢想！雖然我想了這爾濟，也踅(seh8)了一大lin3的路，嘛知影時間未當重來，毋過，我佮意棒球的心情未改變，我就歡歡喜喜去欣賞別人拍球，雖然無學著棒球，毋過我會好好仔拍網球佮高爾夫！

        「若準時間會當重來」，這是一件無可能的事誌，毋通空思夢想。所以咱每一个人，攏要跤踏實地，好好仔過日子，把握(ak4)當下，認真拍拼來做好每一件事誌。

        我的演講就講到這，多謝逐家。                                       

                                                              minda 2010.9.10        

※附註：

lok8-lian1-liu2-lian1    虛度光陰。