按怎面對憂愁的困境 

面對無好的代誌，愛用積極的態度，積極的意思就是無閃避，假使是閃避，會帶來心情懊惱、操煩，叫做中第二枝的箭。 

面對無好的代誌，中了第一枝箭，第一枝箭是別人射來的；即第二枝箭是家己射的，戇甲未扒癢的人，別人射第一枝箭，家己煞閣射家己第二枝箭、第三枝箭、第四枝箭、第五枝箭。第一枝箭是姑不將接受的，第二枝箭、第三枝箭、第四枝箭是家己做得來，自作自受、家己折磨家己，敢有必要？ 

上驚是折磨家己無打緊，揣無解決的方法，煞來採取自暴自棄，或者報復的手段，亦是轉踅來見怪別人，對無辜的人、無辜的動物、無辜的物件發脾氣出水。咱的心靈煞予家己的無明咧變猴弄。 

靜思語有一句話「普天三無」講了真好，伊講：「普天下無我會討厭的人，普天下無我未信任的人，普天下無我未原諒的人。」當汝普天下無我會討厭的人，普天下無我未信任的人，普天下無我未當原諒的人，世俗的一切好歹、善惡、是非，咱攏認捌清楚，毋過閣用開朗的心共包容，汝就是一位智者，無煩惱的人。 

　　咱有即份光明的心，閣再去為眾人服務，溫暖別人、幫贊別人、去付出。按呢咱的心就未予憂悶、操煩的心占有。時時觀照咱的心靈，是毋是予烏暗、憂愁占有去。人生有時像一筊皮箱，愛用的時共提起來，無須要用的時共伊放下，該放下的時毋放下，就像拖著沉重的行李，未自在。憂愁、煩惱是咱愛共伊放下，提起的是彼份包容、自在的心。